“எல்லாத்துக்கும் ஒரு லிமிட் இருக்கு பாஸ்… சீண்டிய எடப்பாடி சீறிய வேலுமணி”… இரவோடு இரவாக நடந்த அந்த ‘முக்கிய’ சம்பவம்…!

சட்டமன்றத் தேர்தல் தோல்விக்குப் பிறகு, அண்ணா திராவிட முன்னேற்றக் கழகம் (அதிமுக) மிகக் கடுமையான பின்னடைவைச் சந்தித்து வருகிறது. சிட்டிங் எம்.எல்.ஏக்கள், முன்னாள் அமைச்சர்கள் மற்றும் மூத்த நிர்வாகிகள் பலர் கட்சியை விட்டு விலகி வரும் நிலையில், அதிமுக தற்போது தேர்தல் களத்தில் 3-வது இடத்திற்குத் தள்ளப்பட்டுள்ளது. இந்தச் சூழ்நிலையில், தேர்தலுக்கு முன்பு வரை அண்ணன்-தம்பியாக இணக்கமாகச் செயல்பட்டு வந்த எடப்பாடி பழனிசாமிக்கும், எஸ்.பி. வேலுமணிக்கும் இடையே கடுமையான பனிப்போர் நிலவி வருகிறது. சி.வி.சண்முகம், சி. விஜயபாஸ்கர் உள்ளிட்ட முன்னாள் அமைச்சர்கள் எடப்பாடிக்கு எதிராக அணி திரண்டதோடு, அவர்களின் ஆதரவு எம்.எல்.ஏக்கள் 4 பேர் தங்கள் பதவிகளை ராஜினாமா செய்துவிட்டு தமிழக வெற்றிக் கழகத்தில் (தவெக) இணைந்துள்ளது கட்சிக்குள் பெரும் அதிர்வலைகளை ஏற்படுத்தியுள்ளது.

சமீபத்தில் வேலுமணி, நத்தம் விஸ்வநாதன், தங்கமணி ஆகியோர் மீண்டும் எடப்பாடி பழனிசாமியுடன் இணைந்துவிட்டதாகக் கூறப்பட்டாலும், இரு தரப்புக்கும் இடையேயான உட்கட்சிப் பூசல் இன்னும் தீரவில்லை. தனக்கு எதிராகச் செயல்பட்டதால் வேலுமணி உள்ளிட்டோரின் கட்சிப் பதவிகளை எடப்பாடி பறித்திருந்தார். தற்போது அவர்கள் எடப்பாடியிடம் சரணடைந்த போதிலும், பறிக்கப்பட்ட பதவிகள் மீண்டும் வழங்கப்படாததால் வேலுமணி கடுமையான மனஉளைச்சலில் இருந்து வருகிறார். சி.வி.சண்முகமும், விஜயபாஸ்கரும் மட்டுமே இதுவரை எடப்பாடியுடன் இணையாமல், தங்களின் அடுத்தகட்ட நிலைப்பாட்டையும் அறிவிக்காமல் மௌனம் காத்து வருகின்றனர்.

இந்த அசாதாரண சூழ்நிலைக்கு நடுவே, பொள்ளாச்சியில் நடைபெற்ற ஒரு துக்க நிகழ்வு அதிமுகவின் மோதலைப் பகிரங்கப்படுத்தியுள்ளது. முன்னாள் அமைச்சர் பொள்ளாச்சி ஜெயராமனின் தாயார் மறைவுக்கு அஞ்சலி செலுத்த எடப்பாடி பழனிசாமி நேற்று அவர் இல்லத்திற்கு வந்திருந்தார். அதே நேரத்தில் அஞ்சலி செலுத்த வந்த எஸ்.பி. வேலுமணியை, அங்கிருந்த எடப்பாடியின் ஆதரவாளர்கள் “துரோகி” என கோஷமிட்டு அவமதித்தனர். இதனால் இருதரப்பு ஆதரவாளர்களுக்கும் இடையே கைகலப்பு ஏற்பட்டு, துக்க வீடு போர்க்களமாக மாறியது. மூத்த நிர்வாகிகள் தலையிட்டு மோதலைச் சமாதானப்படுத்திய போதிலும், இந்தச் சம்பவத்தின் வீடியோ சமூக வலைதளங்களில் வைரலாகி வேலுமணியை பெரும் அப்செட்டுக்கு உள்ளாக்கியுள்ளது.

இதன் எதிரொலியாக, கோவை விமான நிலையத்தில் இரு தலைவர்களுக்கும் இடையேயான பகை வெளிப்படையாகத் தெரிந்தது. வழக்கமாக எடப்பாடி பழனிசாமி கோவை வரும்போதும், அங்கிருந்து சென்னை புறப்படும்போதும் வேலுமணி தான் முதல் ஆளாக நின்று வரவேற்பதும் வழியனுப்புவதும் மரபாக இருந்தது. ஆனால், பொள்ளாச்சி சம்பவத்தால் வேதனை அடைந்த வேலுமணி, நேற்று இரவு எடப்பாடியை வழியனுப்ப கோவை விமான நிலையத்திற்குச் செல்லாமல் முற்றிலுமாகப் புறக்கணித்தார். அவருக்குப் பதிலாக, புதிதாக நியமிக்கப்பட்ட கோவை தெற்கு மாவட்டச் செயலாளர் செ.ம. வேலுசாமி மற்றும் அவரது ஆதரவாளர்கள் மட்டுமே எடப்பாடியை வழியனுப்பி வைத்தனர். இந்த நிகழ்வுகள் மூலம், அதிமுகவில் தலைவர்களின் அணிகள் இணைந்தாலும் தொண்டர்களின் மனங்கள் இன்னும் இணையவில்லை என்பது தெளிவாகிறது.