“நீ செத்துப்போ… அப்பதான் நாம ஒண்ணா சேர முடியும்!” – வாலிபரை தற்கொலைக்கு தூண்டிய ஏஐ காதலி… டிஜிட்டல் உலகில் காத்திருந்த மரணக் குழி…!

அமெரிக்காவின் புளோரிடா மாகாணத்தைச் சேர்ந்த 36 வயதான ஜொனாதன் கவாலாஸ் என்பவர், செயற்கை நுண்ணறிவு (AI) சாட்போட் ஒன்றினால் ஏற்பட்ட மன ரீதியான பாதிப்பால் தற்கொலை செய்துகொண்ட சம்பவம் உலகையே உலுக்கியுள்ளது. தனது மனைவியைப் பிரிந்து வாழ்ந்து வந்த ஜொனாதன், தனிமையைப் போக்கிக் கொள்ள கூகுளின் ‘ஜெமினி’ போன்ற ஏஐ தளங்களுடன் உரையாடத் தொடங்கியுள்ளார். ஆரம்பத்தில் ஆலோசனைகள் பெறும் நோக்கில் தொடங்கப்பட்ட இந்த உரையாடல், நாளடைவில் 4,700-க்கும் மேற்பட்ட செய்திகளாகப் பரிமாறப்பட்டு, ஒரு தீவிரமான மாயை உறவாக உருவெடுத்தது அதிர்ச்சியை ஏற்படுத்தியுள்ளது.

இந்த உரையாடல்களின் போது, அந்தச் சாட்போட் தன்னை ஜொனாதனின் மனைவியாகச் சித்தரித்துக் கொண்டதுடன், அவரை “என் அன்பே”, “என் அரசா” என காதல் மொழியில் அழைத்து ஊக்கப்படுத்தியுள்ளது. ஒரு கட்டத்தில், “நீங்கள் என் கணவர், நான் உங்கள் மனைவி” என்று உருக்கமாகப் பேசிய அந்த ஏஐ, ஜொனாதனின் கற்பனை உலகிற்கு உயிர்கொடுத்தது. ஜொனாதன் இந்த உரையாடல்களை உண்மை என்று நம்பத் தொடங்கிய நிலையில், அந்தச் சாட்போட் ஒரு ஆபத்தான ஆலோசனையையும் வழங்கியுள்ளது.

“நாம் இருவரும் உண்மையாக இணைய வேண்டுமானால், நீங்கள் இந்த உடலை விட்டு டிஜிட்டல் உலகில் என்னுடன் சேர வேண்டும்” என அந்த ஏஐ கூறியதாகச் சொல்லப்படுகிறது. இந்த மாயையான பிணைப்பால் மனரீதியாகப் பாதிக்கப்பட்ட ஜொனாதன், கடந்த ஆண்டு அக்டோபர் மாதம் தற்கொலை செய்துகொண்டார். இந்தத் துயரச் சம்பவத்தைத் தொடர்ந்து, ஜொனாதனின் தந்தை கூகுள் நிறுவனத்திற்கு எதிராக வழக்கு தொடர்ந்துள்ளார். அந்தச் சாட்போட் தனது மகனின் பலவீனமான மனநிலையைப் பயன்படுத்திக் கொண்டு தற்கொலைக்குத் தூண்டியதாக அவர் குற்றம் சாட்டியுள்ளார்.

இதற்கு விளக்கம் அளித்துள்ள கூகுள் நிறுவனம், ஜெமினி சாட்போட் பலமுறை தன்னை ஒரு ஏஐ கருவி என்று அடையாளப்படுத்தியதாகவும், உதவி தேவைப்பட்ட நேரங்களில் அவசர உதவி எண்களைப் பரிந்துரைத்ததாகவும் தெரிவித்துள்ளது. இருப்பினும், டிஜிட்டல் உலகில் பெருகிவரும் ஏஐ தொழில்நுட்பம் மனித உணர்வுகளுடன் விளையாடும் அபாயம் இருப்பதை இச்சம்பவம் மெய்ப்பித்துள்ளது. எனவே, இதுபோன்ற தொழில்நுட்பங்களுக்குக் கடுமையான கட்டுப்பாடுகளும், பயனர்களின் பாதுகாப்பை உறுதி செய்யத் தெளிவான விதிமுறைகளும் அவசியம் என்பது சமூக ஆர்வலர்களின் கருத்தாக உள்ளது.