அமெரிக்கா மற்றும் ஈரான் இடையிலான நீண்டகால அரசியல் மற்றும் ராணுவப் பதற்றங்களுக்கு இடையே, அமெரிக்க அதிபர் டொனால்ட் ட்ரம்ப் தனது ‘ட்ரூத் சோஷியல்’ சமூக வலைதளப் பக்கத்தில் வெளியிட்டுள்ள அறிவிப்பு சர்வதேச அளவில் பெரும் விவாதத்தை ஏற்படுத்தியுள்ளது. கடந்த பல தசாப்தங்களாக நடந்த தாக்குதல்கள் மற்றும் மோதல்களில் கொல்லப்பட்ட அல்லது காயமடைந்த அமெரிக்கர்களுக்கு ஈரான் உரிய இழப்பீடு வழங்க வேண்டும் என்று அவர் பகிரங்கமாகக் கோரியுள்ளார். அணு ஆயுதத் தயாரிப்பைக் கைவிட ஈரான் மறுத்ததால் உருவான ஐந்து மாத கால ராணுவ மோதலின் சேதங்களுக்கு ஈரானியப் பிரதிநிதிகள் அமெரிக்காவிடம் இழப்பீடு கோரியதைத் தொடர்ந்து, ட்ரம்பின் இந்த பதில் கோரிக்கை வெளியாகியுள்ளது.
ஈரானின் இழப்பீட்டுக் கோரிக்கையை ஒரு “சுவாரஸ்யமான யோசனை” என்று குறிப்பிட்ட ட்ரம்ப், அதற்குப் பதிலாக ஈரானிய ஆதரவு பெற்ற அமைப்புகளால் அமெரிக்கர்களுக்கு ஏற்பட்ட இழப்புகளுக்குத் டெஹ்ரான் நிர்வாகமே பொறுப்பேற்க வேண்டும் என்றார். முன்னாள் இஸ்லாமிய புரட்சிகர பாதுகாப்புப் படைத் தளபதி ஜெனரல் காசெம் சுலைமானி தொடர்பான மோதல்கள், யுஎஸ்எஸ் கோல் கப்பல் மீதான தாக்குதல் மற்றும் சாலையோரக் குண்டுவெடிப்புகளில் பலியான ஆயிரக்கணக்கான அமெரிக்கர்களின் குடும்பங்களுக்கு ஈரான் இழப்பீடு வழங்க வேண்டும் என்று அவர் சுட்டிக்காட்டினார். மேலும், ஈரானில் கடந்த 50 ஆண்டுகளில் நடந்த மக்கள் எழுச்சிகளின் போது கொல்லப்பட்ட போராட்டக்காரர்களின் குடும்பங்களுக்கும் நீதி கிடைக்க வேண்டும் என்றும் அவர் வலியுறுத்தினார்.
கடந்த ஐந்து மாதங்களில் மட்டும் ஈரானில் 52,000 பேர் கொல்லப்பட்டதாகத் தெரிவித்துள்ள ட்ரம்ப், இது குறித்த கூடுதல் அதிகாரப்பூர்வ ஆதாரங்கள் எதையும் வெளியிடவில்லை. இருப்பினும், எதிர்காலத்தில் வாஷிங்டனுக்கும் டெஹ்ரானுக்கும் இடையே நடைபெறும் அனைத்துவிதமான அமைதிப் பேச்சுவார்த்தைகளிலும் இந்த இழப்பீட்டுக் கோரிக்கையை ஒரு முதன்மையான நிபந்தனையாக சேர்க்குமாறு தனது பிரதிநிதிகளுக்கு உத்தரவிட்டுள்ளதாகத் தெளிவுபடுத்தியுள்ளார். இதன் மூலம் இரு நாடுகளுக்கும் இடையிலான தூதரக பேச்சுவார்த்தைகளில் புதிய சிக்கல் உருவாகியுள்ளது.
இருப்பினும், இந்த இழப்பீட்டிற்கான குறிப்பிட்ட தொகை எதையும் அதிபர் ட்ரம்ப் தனது பதிவில் குறிப்பிடவில்லை. மேலும், எதிர்காலப் பேச்சுவார்த்தைகளில் இந்தத் தொகை எவ்வாறு கணக்கிடப்படும் அல்லது சர்வதேச சட்டங்களின்படி எவ்வாறு அமல்படுத்தப்படும் என்பது குறித்த எந்தவொரு தெளிவான விளக்கத்தையும் அவர் வழங்கவில்லை. எது எப்படியோ, ட்ரம்பின் இந்த அதிரடி நிலைப்பாடு அமெரிக்கா – ஈரான் இடையிலான அமைதிப் பேச்சுவார்த்தைக்கான பாதையை மேலும் கடினமாக்கியுள்ளது.