ஷாங்காய் ஒத்துழைப்பு அமைப்பின் (SCO) உச்சி மாநாட்டின் இடையே, இந்தியப் பிரதமர் நரேந்திர மோடி மற்றும் ஈரான் அதிபர் மசூத் பெஷெஷ்கியன் ஆகியோருக்கு இடையிலான முக்கியச் சந்திப்பு பிஷ்கெக்கில் நடைபெற்றது. இக்கூட்டத்தில் இருநாடுகளிடையேயான வர்த்தக உறவை மேலும் விரிவுபடுத்துவது மற்றும் பல்வகைப்படுத்துவது குறித்து இரு தலைவர்களும் தீவிரமாக விவாதித்தனர். அத்துடன் மேற்கு ஆசியாவில் நிலவும் தற்போதைய மோதல்கள், சர்வதேச வர்த்தகக் கப்பல்கள் மற்றும் மாலுமிகளின் பாதுகாப்பு போன்ற முக்கிய பிராந்திய விவகாரங்களும் இச்சந்திப்பில் முக்கிய இடம்பெற்றன.
இச்சந்திப்பைத் தொடர்ந்து, அமெரிக்க வெளியுறவுத்துறை அமைச்சர் மார்கோ ரூபியோ ‘தி பிரையன் கில்மீட் ஷோ’ நிகழ்ச்சியில் பேசுகையில், ஈரானுடன் வர்த்தகம் செய்யும் இந்தியா உள்ளிட்ட நாடுகளுக்கு மறைமுக எச்சரிக்கை விடுத்துள்ளார். ஈரானின் அணுஆயுத உற்பத்தி மற்றும் பயங்கரவாத நடவடிக்கைகளுக்கு நிதி ஆதாரம் கிடைக்கும் வகையில் எந்தவொரு நாடும் உதவி செய்தால், அந்த நாடுகளின் மீதும் அமெரிக்கா கடுமையான தடைகளை விதிக்கும் என்று அவர் திட்டவட்டமாகக் கூறியுள்ளார். டொனால்ட் ட்ரம்ப் நிர்வாகம் ஈரான் மீதான பொருளாதார அழுத்தத்தை அதிகரித்து வரும் நிலையில், ஈரானுடன் வணிகம் செய்யும் நிறுவனங்களுக்கு இரண்டாம் நிலைத் தடைகள் (Secondary Sanctions) விதிக்கப்படும் என்றும் அச்சுறுத்தப்பட்டுள்ளது.
அமெரிக்க கருவூலச் செயலாளர் ஸ்காட் பெசன்ட், ஈரானின் பொருளாதார உயிர்நாடிகளை முழுமையாகத் துண்டிக்கும் நோக்கில் ‘ஆபரேஷன் எகனாமிக் அவுட்காஸ்ட்’ என்ற அதிரடி நடவடிக்கையைத் தொடங்கியுள்ளார். இதனை ஒரு ‘பொருளாதார டி-டே’ (Economic D-Day) என்று அமெரிக்கா வர்ணித்துள்ளது. இருப்பினும், தற்போதைக்கு இந்தியாவுக்கும் ஈரானுக்கும் இடையே அதிகாரப்பூர்வமாகப் புதிய வர்த்தக ஒப்பந்தங்கள் எதுவும் கையெழுத்தாகவில்லை என்பதை ஒப்புக்கொண்ட மார்கோ ரூபியோ, ஒவ்வொரு நாட்டிற்கும் சுயாதீனமான வெளியுறவுக் கொள்கையை வகுத்துக் கொள்ள உரிமை உண்டு என்பதையும் சுட்டிக்காட்டியுள்ளார்.
முந்தைய காலங்களில் அமெரிக்காவே ஈரானிய பிரதிநிதிகளுடன் பேச்சுவார்த்தை நடத்தியதை நினைவுகூர்ந்த ரூபியோ, வணிக ரீதியிலான தடைகளைத் தாண்டுவதற்கு ஈரானுக்கு யாரும் உதவக்கூடாது என்பதில் அமெரிக்கா உறுதியாக இருப்பதாகத் தெரிவித்தார். பிராந்தியப் பாதுகாப்பு, எரிசக்தித் தேவை மற்றும் துறைசார் துறைமுக வளர்ச்சி போன்ற முக்கிய காரணங்களுக்காக ஈரானுடனான உறவை இந்தியா தக்கவைத்துக்கொள்ள விரழும் நிலையில், அமெரிக்காவின் இந்த அச்சுறுத்தல் சர்வதேச அரசியல் அரங்கில் பெரும் கவனத்தைப் பெற்றுள்ளது.