ரஷ்யாவுடன் கச்சா எண்ணெய் டீல் க்ளோஸ்..? இந்தியப் பொருளாதாரத்தை உலுக்கும் அமெரிக்காவின் செக்..! அடுத்து என்ன நடக்கப்போகிறது..?

மத்திய கிழக்கில் நிலவி வரும் பதற்றம் மற்றும் ஹார்முஸ் ஜலசந்தி (Strait of Hormuz) முற்றுகை காரணமாக உலகளாவிய எண்ணெய் சந்தையில் பெரும் நெருக்கடி ஏற்பட்டுள்ளது. இந்த இக்கட்டான சூழ்நிலையில், ரஷ்யாவிடமிருந்து கச்சா எண்ணெய் வாங்குவதற்காக இந்தியா உள்ளிட்ட சில நாடுகளுக்கு வழங்கப்பட்டிருந்த தற்காலிக விலக்கு அல்லது சலுகையை மேலும் நீட்டிக்க டொனால்ட் டிரம்ப் தலைமையிலான அமெரிக்க நிர்வாகம் மறுத்துவிட்டது. அமெரிக்காவின் இந்த அதிரடி முடிவால் சர்வதேச சந்தையில் கச்சா எண்ணெய் விநியோகம் பாதிக்கப்பட்டு, வரும் நாட்களில் இந்தியாவில் பெட்ரோல், டீசல் மற்றும் சிஎன்ஜி (CNG) விலை மீண்டும் கணிசமாக உயரக்கூடும் என்ற அச்சம் எழுந்துள்ளது.

ரஷ்யா-உக்ரைன் போருக்குப் பிறகு மேற்கத்திய நாடுகள் ரஷ்ய எண்ணெய் மீது கடுமையான தடைகளை விதித்திருந்தன. எனினும், மார்ச் 2026-இல் ஈரான் மோதல் மற்றும் ஹார்முஸ் ஜலசந்தி பகுதியில் பதற்றம் தீவிரமடைந்ததைத் தொடர்ந்து, எண்ணெய் பற்றாக்குறையைத் தவிர்க்க அமெரிக்கா ஒரு தற்காலிக சலுகையை வழங்கியிருந்தது. இந்த சலுகைக் காலம் கடந்த மே 16 உடன் முடிவடைந்த நிலையில், ரஷ்யாவின் வருவாயைக் கட்டுப்படுத்த வேண்டும் என்ற ஐரோப்பிய நாடுகளின் அழுத்தத்தால் அமெரிக்கா இந்த விலக்கை ரத்து செய்துள்ளது. இதன் காரணமாக உலகளவில் கச்சா எண்ணெய் விலை உயர்ந்து, நுகர்வோரைப் பாதிப்பதோடு பணவீக்கத்தையும் அதிகரிக்கும் என்று நிபுணர்கள் எச்சரிக்கின்றனர்.

மேற்காசியப் பகுதியில் பதற்றம் நிலவிய சூழலில், இந்தியா தனது கச்சா எண்ணெய் தேவையைப் பூர்த்தி செய்ய ரஷ்யாவையே பெரிதும் நம்பியிருந்தது. மார்ச் மாதத்தில் இந்தியாவின் தினசரி எண்ணெய் இறக்குமதியில் சுமார் 50 சதவீதம் ரஷ்யாவிடமிருந்தே பெறப்பட்டது. ஆனால், தற்போது அமெரிக்காவின் சலுகை ரத்து செய்யப்பட்டுள்ளதால் இந்தியாவுக்கு இரட்டைச் சவால்கள் உருவாகியுள்ளன. ஏற்கனவே இந்தியாவில் பெட்ரோல், டீசல் விலை லிட்டருக்கு 3 ரூபாய் வரை உயர்த்தப்பட்டுள்ள நிலையில், தற்போதைய அமெரிக்காவின் இந்த முடிவு இந்திய எரிபொருள் சந்தையில் கூடுதல் சுமையை ஏற்படுத்தும் என எதிர்பார்க்கப்படுகிறது.