“உயிரோடு இருக்கும் வரை சும்மா இருக்க மாட்டோம்”…. அமெரிக்காவிற்கு ஈரான் அதிபர் கொடுத்த ‘மிரட்டல்’ அதிர்வேட்டு…. மத்திய கிழக்கில் மீண்டும் பதற்றம்..!

மத்திய கிழக்கில் பதற்றம் அதிகரித்து வரும் சூழலில், ஹார்முஸ் ஜலசந்தியை மீண்டும் திறப்பது குறித்து ஈரான் அதிபர் மசூத் பெஷெஷ்கியன் முக்கிய அறிவிப்பு ஒன்ற வெளியிட்டுள்ளார். அமெரிக்கா தன் மீதான பொருளாதாரத் தடைகளையும் முற்றுகை நடவடிக்கைகளையும் கைவிட்டால், சர்வதேச அளவில் அங்கீகரிக்கப்பட்ட கடல்சார் சட்டக் கட்டமைப்பிற்குள் செயல்பட டெஹ்ரான் தயாராக இருப்பதாக அவர் தெரிவித்துள்ளார். இந்தியா டுடேவுக்கு அளித்த பிரத்யேக பேட்டியில், இந்த முக்கிய கடல்வழிப் பாதையைப் பாதுகாப்பாகக் கையாள்வது தொடர்பாக ஓமான் நாட்டுடன் ஈரான் பேச்சுவார்த்தை நடத்தி வருவதாக அவர் சுட்டிக்காட்டினார்.

அமெரிக்கா மற்றும் அதன் கூட்டணி நாடுகளின் தொடர் அழுத்தங்களுக்கும் தாக்குதல்களுக்கும் பதிலடியாகவே ஈரான் தற்காப்பு நடவடிக்கைகளில் ஈடுபட்டு வருகிறது என்று பெஷெஷ்கியன் தெளிவுபடுத்தினார். “இந்த மோதலை ஈரானோ அல்லது ஹிஸ்புல்லாவோ தொடங்கவில்லை; மாறாக, தங்கள் நிலப்பரப்பைப் பாதுகாக்கவே இத்தகைய நடவடிக்கைகளை எடுத்து வருகின்றனர்” என்று அவர் குறிப்பிட்டார். அத்துடன், எந்தவித நியாயமான அடிப்படை இல்லாமல் அமெரிக்கா இப்பகுதிக்கு ஆயுதங்களைக் கொண்டுவந்து பிராந்தியப் போக்குவரத்து வழித்தடங்களை முடக்குவது குறித்து அவர் தனது கவலையையும் கேள்வியையும் எழுப்பினார்.

ஈரானின் இறையாண்மைக்கு அச்சுறுத்தல் ஏற்படும் வரை தற்காப்புப் பதிலடிகள் தொடரும் என்பதை உறுதிபடக் கூறிய அவர், “நாம் உயிருடன் இருக்கும் வரை எதிர்த்துப் போராட வேண்டும், இறந்த பிறகு பதிலடி கொடுக்க முடியாது” என்ற தத்துவார்த்தப் பார்வையை முன்வைத்தார். ஈரானிய மக்கள் எதிர்கொள்ளும் பொருளாதாரப் பாதிப்புகளுக்கு அமெரிக்காவின் கடுமையான தடைகளே முழுக் காரணம் என்றும், இந்தத் தடைகள் சாதாரண நோயாளிகளின் சிகிச்சை மற்றும் மக்களின் வாழ்வாதாரத்தைப் கடுமையாகப் பாதித்து வறுமையையும் அதிருப்தியையும் ஏற்படுத்துவதாக அவர் சாடினார்.

ராணுவ ரீதியான தாக்குதல்கள் மூலம் ஈரானை வீழ்த்த முடியாத வாஷிங்டன், தற்போது பொருளாதார நெருக்கடிகள் மூலமாக ஈரானிய மக்களை ஒடுக்க நினைப்பதாக குற்றம்சாட்டிய பெஷெஷ்கியன், அமெரிக்காவின் இந்த முயற்சி நிச்சயம் தோல்வியடையும் என்று அழுத்தமாகக் கூறினார். அமெரிக்கா தன் மீதான அநியாயமான தடைகளையும் முற்றுகையையும் விலக்கிக் கொண்டால் மட்டுமே ஹார்முஸ் ஜலசந்தியை இயல்புநிலைக்குக் கொண்டுவருவது சாத்தியமாகும் என்பதை ஈரான் அதிபரின் இந்தப் பேட்டி வெளிப்படையாக உணர்த்துகிறது.