“எங்களுக்கு குழந்தை இல்லை.. என் கணவனோடு உடலுறவு வைத்துக்கொள்”… பணிப்பெண்ணை சித்திரவதை செய்த தம்பதி… திடுக்கிடும் சம்பவம்…!

உத்தரப் பிரதேச மாநிலம் கோரக்பூர் மாவட்டத்தில், குழந்தை இல்லாத தம்பதியினர் தங்களின் வீட்டுப் பணிப்பெண்ணை மிரட்டி, கணவனுடன் உடலுறவு கொள்ளுமாறு வற்புறுத்திய அதிர்ச்சிச் சம்பவம் வெளிச்சத்திற்கு வந்துள்ளது. ஷாஹுபூர் பகுதியில் வசித்து வரும் பிரிஜ்பால் சிங் மற்றும் அவரது மனைவி சோனியா ஆகிய இருவரும், திருமணமாகி நீண்ட நாட்களாகியும் குழந்தை இல்லாததால், தங்கள் வீட்டில் வேலை செய்யும் பணிப்பெண் மூலம் குழந்தையைப் பெற்றுக்கொள்ள ஒரு விபரீத திட்டத்தைத் தீட்டியுள்ளனர். இதற்குச் சம்மதித்தால் நிலமும், வீடும் தருவதாக ஆசை காட்டி அந்தப் பெண்ணை அவர்கள் வற்புறுத்தியுள்ளனர்.

பாதிக்கப்பட்ட அந்தப் பெண் குஷிநகரைச் சேர்ந்தவர் ஆவார். மாதம் பத்தாயிரம் ரூபாய் சம்பளத்திற்கு வீட்டு வேலைக்குச் சேர்ந்த அந்தப் பெண்ணிடம், சோனியா தொடக்கத்தில் நயமாகப் பேசித் தன் கணவருடன் உடலுறவு கொள்ளுமாறு கேட்டுள்ளார். ஆனால், அந்தப் பெண் இதற்குத் திட்டவட்டமாக மறுப்பு தெரிவித்துள்ளார். இதனால் ஆத்திரமடைந்த தம்பதியினர், அந்தப் பெண்ணை வீட்டிலேயே சிறை வைத்துத் தொடர் சித்திரவதைகளுக்கு உள்ளாக்கியுள்ளனர். ஒருகட்டத்தில் போதை நிலையில் இருந்த சோனியா, அந்தப் பெண்ணைக் கொலை செய்துவிடுவதாக மிரட்டியதோடு, தனது கணவரை வைத்தே அவரைத் துன்புறுத்தியுள்ளார்.

இந்தக் கொடுமைகளை ஒரு வீடியோவாகவும் அந்தத் தம்பதியினர் பதிவு செய்துள்ளனர். அஜ்மீரில் நிலம் தருவதாக மீண்டும் மீண்டும் ஆசை காட்டியும், அந்தப் பெண் பணியாததால் பிரிஜ்பால் சிங் அப்பெண்ணை உடல் ரீதியாகவும், மன ரீதியாகவும் கடுமையாக வதைத்துள்ளார். பல நாட்கள் நரக வேதனையை அனுபவித்த அந்தப் பெண், ஒருவழியாக அந்த வீட்டிலிருந்து தப்பிச் சென்று காவல் நிலையத்தில் புகாரளித்துள்ளார். தன்னிடம் நடத்தப்பட்ட அத்துமீறல்கள் மற்றும் மிரட்டல்கள் குறித்த உண்மைகளை அவர் காவல்துறையினரிடம் கண்ணீருடன் விவரித்துள்ளார்.

தற்போது இந்தச் சம்பவம் தொடர்பாக வழக்குப் பதிவு செய்துள்ள காவல்துறையினர், தலைமறைவாக உள்ள பிரிஜ்பால் சிங் மற்றும் சோனியா ஆகிய இருவரையும் தீவிரமாகத் தேடி வருகின்றனர். குற்றம் சாட்டப்பட்ட தம்பதியினரைப் பற்றித் தகவல் கொடுப்பவர்களுக்குப் பத்தாயிரம் ரூபாய் வெகுமதி வழங்கப்படும் என்றும் காவல்துறை அறிவித்துள்ளது. குழந்தைப் பேற்றுக்காக ஒரு பெண்ணைச் சிறை வைத்துச் சித்திரவதை செய்த இந்தச் சம்பவம், கோரக்பூர் பகுதியில் பெரும் பரபரப்பையும் அதிர்ச்சியையும் ஏற்படுத்தியுள்ளது.