நிஜ வாழ்க்கை ‘த்ரில்லர்’: “நீ கருப்பா இருக்க… எனக்கு தகுதி இல்ல!” – கணவரை கூலிப்படை வைத்து தீர்த்துக்கட்டிய ‘பியூட்டி பார்லர்’ மனைவி…!

மத்தியப் பிரதேசத்தின் தார் பகுதியில் மசாலா வியாபாரியான தேவ்கிருஷ்ணா புரோஹித் (28) என்பவர், கடந்த ஏப்ரல் 7-ம் தேதி இரவு தனது வீட்டிலேயே ரத்த வெள்ளத்தில் பிணமாகக் கண்டெடுக்கப்பட்டார். தொடக்கத்தில், கொள்ளையர்கள் வீட்டிற்குள் புகுந்து நகை மற்றும் பணத்திற்காகத் தனது கணவரைக் கொன்றுவிட்டதாக அவரது மனைவி பிரியங்கா புரோஹித் நாடகமாடினார். சுமார் 3.5 லட்சம் ரூபாய் மதிப்பிலான பொருட்கள் கொள்ளை போனதாகவும், தன்னை அவர்கள் கட்டிப்போட்டு சித்திரவதை செய்ததாகவும் கூறி காவல்துறையினரை திசைதிருப்ப முயன்றார்.

இருப்பினும், காவல்துறையினரின் தீவிர விசாரணையில் பிரியங்காவின் வாக்குமூலங்களில் முரண்பாடுகள் இருப்பது கண்டறியப்பட்டது. குறிப்பாக, கொள்ளை போனதாகச் சொல்லப்பட்ட நகைகள் வீட்டிற்குள்ளேயே மறைத்து வைக்கப்பட்டிருந்தது கண்டுபிடிக்கப்பட்டது. பிரியங்காவின் கைபேசித் தரவுகளை ஆய்வு செய்தபோது, அவர் கம்லேஷ் புரோஹித் என்ற நபருடன் நெருங்கிய தொடர்பில் இருந்ததும், இருவரும் இணைந்து தேவ்கிருஷ்ணாவைக் கொலை செய்யத் திட்டமிட்டதும் அம்பலமானது. கணவர் “கருப்பாக” இருப்பதாகவும், தனக்குத் தகுதியற்றவர் என்றும் கூறி பிரியங்கா அவரை அடிக்கடி அவமானப்படுத்தி வந்ததாகக் குடும்பத்தினர் குற்றம் சாட்டுகின்றனர்.

இந்தக் கொலையை அரங்கேற்ற கம்லேஷ் மூலமாக ஒரு லட்சம் ரூபாய்க்குச் சுரேந்திர பாட்டி என்ற கூலிப்படை கொலையாளி ஒப்பந்தம் செய்யப்பட்டுள்ளார். இதற்காக 50,000 ரூபாய் முன்பணமாக வழங்கப்பட்டுள்ளது. கொலை நடந்த அன்று இரவு, பிரியங்கா திட்டமிட்டே வீட்டின் கதவைத் திறந்து வைத்துள்ளார். உள்ளே புகுந்த சுரேந்திரா, உறங்கிக் கொண்டிருந்த தேவ்கிருஷ்ணாவை கொடூரமாகத் தாக்கி கொலை செய்துள்ளார். பின்னர் இது ஒரு கொள்ளைச் சம்பவம் போலத் தெரிவதற்காக அறையிலிருந்த பொருட்களைச் சூறையாடிவிட்டுத் தப்பிச் சென்றுள்ளார்.

தற்போது பிரியங்கா மற்றும் அவரது காதலன் கம்லேஷ் ஆகிய இருவரையும் காவல்துறையினர் கைது செய்துள்ளனர். தலைமறைவாக உள்ள கூலிப்படை கொலையாளி சுரேந்திராவைத் தேடும் பணி தீவிரப்படுத்தப்பட்டுள்ளது. “என் மகனைக் கொன்றவர்களுக்கு மரண தண்டனை வழங்கப்பட வேண்டும், நீதி மட்டுமே எனக்குத் தேவை” எனப் பாதிக்கப்பட்டவரின் தாயார் கதறி அழுது நீதி கோருகிறார். குடும்ப அமைதிக்காக மனைவியின் அனைத்து கொடுமைகளையும் பொறுத்துக் கொண்ட ஒரு மனிதனின் வாழ்க்கை, துரோகத்தால் இவ்வாறாக முடிவுக்கு வந்துள்ளது அந்தப் பகுதியில் பெரும் சோகத்தை ஏற்படுத்தியுள்ளது.