“தடுக்க முடியாத ஈரானிய ட்ரோன்கள்!”… அமெரிக்காவின் ஆதிக்கத்திற்குச் செக் வைத்த சீனா.. வெளியான திடுக்கிடும் தகவல்கள்…!”

சீனா மற்றும் ஈரான் இடையேயான ராணுவக் கூட்டணி குறித்த அமெரிக்காவின் சமீபத்திய புலனாய்வு அறிக்கை, உலக அரசியலில் பெரும் பரபரப்பை ஏற்படுத்தியுள்ளது. இந்த இரண்டு நாடுகளும் இணைந்து மேற்கத்திய நாடுகளின் பொருளாதாரத் தடைகளை முறியடிக்கவும், ஈரானின் ராணுவ பலத்தை நவீனப்படுத்தவும் ரகசிய ஒப்பந்தங்களை மேற்கொண்டுள்ளதாக அந்த அறிக்கை எச்சரிக்கிறது. குறிப்பாக, ட்ரோன்கள், ஏவுகணைகள் மற்றும் விண்வெளித் தொழில்நுட்பம் ஆகிய துறைகளில் சீனா ஈரானுக்கு வழங்கி வரும் ஆதரவு அமெரிக்காவை அதிர்ச்சியில் ஆழ்த்தியுள்ளது.

இந்தக் கூட்டணியின் முக்கிய அம்சமாக, சீனாவின் ‘பெய்டு’ (BeiDou) செயற்கைக்கோள் வழிசெலுத்தல் அமைப்பு பார்க்கப்படுகிறது. ஈரானிய ஏவுகணைகள் மற்றும் தற்கொலை படை ட்ரோன்கள் (Kamikaze Drones) இலக்குகளைத் துல்லியமாகத் தாக்குவதற்கு இந்தத் தொழில்நுட்பம் பெரிதும் உதவுகிறது. அமெரிக்காவின் ஜிபிஎஸ் (GPS) தொழில்நுட்பத்திற்கு மாற்றாக சீனா உருவாக்கி வரும் இந்த அமைப்பு, ஈரானிய ராணுவம் அமெரிக்கா மற்றும் அதன் நட்பு நாடுகளின் இலக்குகளைத் துல்லியமாகத் தாக்கும் திறனைப் பெற வழிவகுத்துள்ளது.

மேலும், ஈரானுக்குத் தேவையான ஏவுகணை உதிரி பாகங்கள் மற்றும் மேம்படுத்தப்பட்ட வான் பாதுகாப்பு அமைப்புகளையும் (HQ-16, HQ-17AE) சீனா வழங்கி வருவதாக அமெரிக்க அறிக்கை கூறுகிறது. ஈரான் தனது பாலிஸ்டிக் ஏவுகணைத் திட்டத்தை வலுப்படுத்த சீனாவிடமிருந்து ‘சோடியம் பெர்குளோரேட்’ (Sodium Perchlorate) போன்ற வேதிப்பொருட்களைப் பெற்றுள்ளதாகவும் தகவல்கள் வெளியாகியுள்ளன. இது மத்திய கிழக்கு பிராந்தியத்தில் ஈரானின் ஆதிக்கத்தை அதிகரிக்கச் செய்வதோடு, அப்பகுதியில் நிலவும் பாதுகாப்பற்ற சூழலை மேலும் தீவிரமாக்குகிறது.

இந்தக் கூட்டுறவு வெறும் ராணுவ ரீதியானது மட்டுமல்லாது, பொருளாதார ரீதியாகவும் மிகவும் ஆழமானது. ஈரானின் எண்ணெய் வளத்தில் 80 சதவீதத்திற்கும் மேலாக சீனா கொள்முதல் செய்வதன் மூலம், அமெரிக்காவின் பொருளாதாரத் தடைகளால் முடங்கிக் கிடக்கும் ஈரானின் பொருளாதாரத்திற்கு சீனா ஒரு உயிர்நாடியாகச் செயல்படுகிறது. இந்த ‘சர்வாதிகார நாடுகளின் அச்சு’ (Axis of Autocracy), வரும் காலங்களில் அமெரிக்காவின் உலகளாவிய ஆதிக்கத்திற்குப் பெரும் சவாலாக அமையும் என அரசியல் வல்லுநர்கள் கணித்துள்ளனர்.