“டெல்லியை உலுக்கிய ‘நீட்’ விவகாரம்… இரவோடு இரவாக கல்வித் துறை செயலாளரை தூக்கியடித்த மத்திய அரசு?”…. நள்ளிரவில் வெளியான அந்த ஒரு அறிவிப்பு….!

‘நீட்’ வினாத்தாள் கசிவு விவகாரம் தேசிய அளவில் பெரும் புயலைக் கிளப்பியுள்ள நிலையில், மத்திய அரசு அதிரடி நடவடிக்கை ஒன்றை மேற்கொண்டுள்ளது. மத்தியக் கல்வித் துறை அமைச்சர் தர்மேந்திர பிரதான் தனது பதவியை ராஜினாமா செய்ய வேண்டும் என்று வலியுறுத்தி டெல்லியில் தொடர்ந்து போராட்டங்கள் தீவிரமடைந்து வருகின்றன. அரசின் மீதான விமர்சனங்கள் வலுத்து வரும் சூழலில், மத்தியக் கல்வித் துறைச் செயலாளராகப் பணியாற்றி வந்த மூத்த ஐ.ஏ.எஸ் அதிகாரி வினீத் ஜோஷி திடீரென அப்பொறுப்பில் இருந்து விடுவிக்கப்பட்டு இடமாற்றம் செய்யப்பட்டுள்ளார்.

1992-ஆம் ஆண்டு மணிப்பூர் கேடர் ஐ.ஏ.எஸ் அதிகாரியான வினீத் ஜோஷி, ஐ.ஐ.டி கான்பூரில் பொறியியல் பட்டமும், ஐ.ஐ.எஃப்.டி-யில் எம்.பி.ஏ பட்டமும் பெற்றவர். தேசிய தேர்வுகள் முகமையின் (NTA) முதல் தலைமை இயக்குநராகவும், சி.பி.எஸ்.இ தலைவராகவும், மணிப்பூர் மாநிலத் தலைமைச் செயலாளராகவும் பணியாற்றி கல்வித்துறையில் நீண்டகால அனுபவம் பெற்றவர். கடந்த 2025 ஜனவரி முதல் மத்தியக் கல்விச் செயலாளராகப் பொறுப்பு வகித்து வந்த இவர், தற்போதைய சர்ச்சைகளுக்கு மத்தியில் பஞ்சாயத்து ராஜ் அமைச்சகத்தின் செயலாளராக மாற்றப்பட்டுள்ளார்.

வினீத் ஜோஷிக்கு பதிலாக மத்தியக் கல்வித் துறையின் புதிய செயலாளராக நரேஷ் கங்க்வார் நியமிக்கப்பட்டுள்ளார். இவர் 1994-ஆம் ஆண்டு ராஜஸ்தான் கேடரைச் சேர்ந்த ஐ.ஏ.எஸ் அதிகாரி ஆவார். எலக்ட்ரானிக்ஸ் மற்றும் கம்யூனிகேஷன் பிரிவில் பி.டெக், ஐ.ஐ.டி டெல்லியில் எம்.டெக் மற்றும் பொருளாதாரத்தில் முதுகலைப் பட்டம் பெற்ற இவர், நிர்வாகத் துறையில் பரந்த அனுபவம் கொண்டவர்.

முன்னதாக ராஜஸ்தான் மாநிலத்தில் சுற்றுச்சூழல், வனத்துறை அமைச்சகத்தின் செயலாளராகப் பணியாற்றியபோது, மாசுக்கட்டுப்பாட்டுக்கான முக்கிய நடவடிக்கைகளைச் செயல்படுத்திப் பெயர் பெற்றவர் நரேஷ் கங்க்வார். தற்போது மத்தியக் கால்நடை மற்றும் பால்வளத் துறையின் செயலாளராகப் பணியாற்றி வந்த இவர், இப்போது நாட்டின் மிக முக்கியத் துறையான கல்வித் துறையை வழிநடத்தும் பொறுப்பை ஏற்றுள்ளார்.