துணை முதலமைச்சர் உதயநிதி ஸ்டாலின் திண்டுக்கல் மாவட்டத்தின் நிலக்கோட்டை, வேடசந்தூர் மற்றும் நாகல் நகர் ஆகிய பகுதிகளில் திமுக வேட்பாளர் ஐ.பி. செந்தில்குமாருக்கு ஆதரவாகத் தீவிரப் பிரச்சாரத்தில் ஈடுபட்டார். அப்போது பேசிய அவர், திண்டுக்கல் என்றாலே ‘பூட்டு’ தான் நினைவுக்கு வரும் என்றும், வரும் சட்டமன்றத் தேர்தலில் அடிமைக் கூட்டத்திற்கும் சங்கிகளுக்கும் திண்டுக்கல் மக்கள் சரியான முறையில் பூட்டுப் போட வேண்டும் என்றும் அறைகூவல் விடுத்தார். தமிழகத்தின் உரிமைகளைக் காக்க மக்கள் உதயசூரியன் சின்னத்திற்கு வாக்களிக்க வேண்டும் என்று அவர் வேண்டுகோள் விடுத்தார்.
தன்னுடைய உரையில் அதிமுக பொதுச்செயலாளர் எடப்பாடி பழனிசாமியை மிகக் கடுமையாகச் சாடிய உதயநிதி, அவர் சசிகலாவின் காலில் விழுந்த விவகாரத்தை மீண்டும் கையில் எடுத்தார். ஆரம்பத்தில் ‘நான் பதவிக்காக யார் காலிலும் விழுந்ததில்லை’ என்று மறுத்த எடப்பாடி பழனிசாமி, தற்போது ‘கால்ல விழுந்தேன், அதில் என்ன தப்பு?’ என்று மாற்றிக் கூறுவதாகச் சுட்டிக்காட்டினார். “அவர் காலில் விழுந்தது கூடத் தவறில்லை, ஆனால் விழுந்த அதே காலை வாரிவிட்டது தான் மிகப்பெரிய துரோகம்” என்று எடப்பாடி பழனிசாமியின் அரசியல் நகர்வுகளை உதயநிதி விமர்சித்தார்.
மேலும், மத்திய அரசின் தொகுதி மறுவரையறை (De-limitation) திட்டத்தால் தமிழகத்திற்கு ஏற்படப்போகும் பாதிப்புகள் குறித்து அவர் விளக்கினார். மக்கள் தொகைக் கணக்கெடுப்பின் அடிப்படையில் எம்பி தொகுதிகளின் எண்ணிக்கை அதிகரிக்கப்படும் போது, தமிழகத்திற்கு முறையாகக் கிடைக்க வேண்டிய 59 இடங்களுக்குப் பதிலாக 47 இடங்களை மட்டுமே வழங்க மத்திய பாஜக அரசு திட்டமிட்டுள்ளதாகக் குற்றம் சாட்டினார். இந்த அநீதியை எதிர்த்து முதல்வர் ஸ்டாலின் குரல் கொடுத்து வரும் வேளையில், ‘முரட்டு அடிமையான’ எடப்பாடி பழனிசாமி இத்திட்டத்தை ஆதரிப்பது தமிழகத்திற்குச் செய்யும் துரோகம் என்றார்.
இறுதியாக, அதிமுக வேட்பாளர் திண்டுக்கல் சீனிவாசன் மற்றும் முன்னாள் அமைச்சர் செல்லூர் ராஜு ஆகியோரை ‘விஞ்ஞானிகள்’ என்று கிண்டல் செய்த உதயநிதி, அவர்களின் கருத்துக்கள் நகைச்சுவையாகவே இருப்பதாகக் குறிப்பிட்டார். கடந்த தேர்தல்களில் தொடர் தோல்விகளைச் சந்தித்து வரும் எடப்பாடி பழனிசாமிக்கு, இந்தத் தேர்தலிலும் மக்கள் தகுந்த பாடம் புகட்ட வேண்டும் என்றும், அவரை ‘மொத்த தோல்வி பழனிசாமியாக’ வீட்டுக்கு அனுப்ப வேண்டும் என்றும் கூறி தனது பிரச்சாரத்தை நிறைவு செய்தார்.