சர்வதேச கச்சா எண்ணெய் சந்தையில் பல தசாப்தங்களாக ஆதிக்கம் செலுத்தி வந்த ஓபெக் (OPEC) அமைப்பிலிருந்து ஐக்கிய அரபு அமீரகம் (UAE) வெளியேற முடிவெடுத்திருப்பது உலகப் பொருளாதாரத்தில் ஒரு பெரும் திருப்புமுனையாகப் பார்க்கப்படுகிறது. சவூதி அரேபியாவுக்கு அடுத்தபடியாக ஓபெக் கூட்டமைப்பில் அதிக செல்வாக்கு கொண்ட நாடாக விளங்கிய அமீரகம், அதன் மொத்த உற்பத்தியில் சுமார் 12 சதவீதத்தை வழங்கி வந்தது. தற்போது மேற்கு ஆசியாவில் போர் பதற்றங்கள் நிலவி வரும் சூழலில், இந்த வெளியேற்றம் ஓபெக் அமைப்பின் ஒருமித்த முடிவெடுக்கும் அதிகாரத்தையும் அதன் வலிமையையும் கணிசமாகக் குறைக்கும் என்பதில் ஐயமில்லை.
அமீரகத்தின் இந்த அதிரடி முடிவுக்குப் பின்னால் தெளிவான பொருளாதாரத் திட்டமிடல் உள்ளது. ஓபெக் அமைப்பு விலையை நிலையாக வைத்திருக்க உற்பத்தியைக் குறைக்க வேண்டும் என்ற கட்டுப்பாட்டை விதித்துள்ள நிலையில், அமீரகமோ தனது எண்ணெய் உற்பத்தித் திறனை அதிகரிக்கப் பல்லாயிரம் கோடிகளை முதலீடு செய்துள்ளது. 2027-க்குள் நாளொன்றுக்கு 5 மில்லியன் பேரல்களை உற்பத்தி செய்ய இலக்கு நிர்ணயித்துள்ள அமீரகத்திற்கு, ஓபெக்கின் ‘உற்பத்திக் கட்டுப்பாடு’ விதிகள் முட்டுக்கட்டையாக இருந்தன. தனது முதலீடுகளுக்கு ஏற்ற லாபத்தைப் பெறவும், முழு உற்பத்தித் திறனைப் பயன்படுத்தவும் இந்தக் கட்டுப்பாடுகளிலிருந்து விடுபடுவதே சிறந்தது என அமீரகம் கருதுகிறது.
கச்சா எண்ணெய் விலை தற்போது பேரலுக்கு 110 டாலரைத் தாண்டியுள்ள நிலையில், அமீரகம் தனது உற்பத்தியை அதிகரிக்கும்போது சர்வதேச சந்தையில் எண்ணெய் வரத்து அதிகரிக்கும். இது நீண்டகால அடிப்படையில் கச்சா எண்ணெய் விலை குறைய வழிவகுக்கும். ஓபெக் அமைப்பின் ஏகபோகக் கட்டுப்பாடு தளர்வதால், சந்தையில் போட்டி அதிகரித்து எண்ணெய் விலையை ஒரு குறிப்பிட்ட மட்டத்திற்குள் வைத்திருக்க உதவும். அமீரகம் தனது உற்பத்தியைத் தங்கு தடையின்றி அதிகரிப்பதன் மூலம், விநியோகச் சங்கிலியில் ஏற்படும் பற்றாக்குறையையும் ஓரளவுக்குச் சமாளிக்க முடியும்.
இந்த மாற்றம் இந்தியாவுக்குப் மிகப்பெரிய சாதகமான அம்சமாகும். உலகின் மூன்றாவது பெரிய எண்ணெய் இறக்குமதி நாடான இந்தியா, தனது தேவையில் 80 சதவீதத்திற்கும் மேலாக இறக்குமதியையே சார்ந்துள்ளது. அமீரகம் உற்பத்தியை அதிகரிக்கும்போது விலை குறைந்தால், இந்தியாவின் இறக்குமதிச் செலவு (Import Bill) குறைந்து அந்நியச் செலாவணி சேமிக்கப்படும். மேலும், அமீரகத்துடன் இந்தியா கொண்டுள்ள வலுவான நட்புறவு காரணமாக, எவ்வித புவிசார் அரசியல் நெருக்கடியும் இன்றி கச்சா எண்ணெய்யைத் தடையின்றிப் பெற முடியும் என்பது இந்தியாவின் எரிசக்திப் பாதுகாப்பிற்கு (Energy Security) வலுசேர்க்கும்.