விநாயகர் ஊர்வலத்தில் பரபரப்பு… மின்சாரம் பாய்ந்து கவிழ்ந்த ட்ராக்டர்…. படுகாயமடைந்த 2 வாலிபர்கள்…. பகீர் சம்பவம்….!!

கர்நாடக மாநிலம் விஜயநகரா மாவட்டம் ஹோசபேட்டே அருகே உள்ள அனந்தசயனகுடி கிராமத்தில் விநாயகர் சிலை ஊர்வலம் கோலாகலமாக நடைபெற்றுக்கொண்டிருந்தது. அப்போது விநாயகர் சிலையை ஏற்றிச் சென்ற டிராக்டரின் மேல் பகுதியில் அலங்காரத்திற்காகக் கட்டப்பட்டிருந்த மூங்கில் கம்பங்கள் எதிர்பாராதவிதமாகச் சாலையின் குறுக்கே சென்ற உயர் அழுத்த மின்சாரக் கம்பியில் உரசியது.

இதனால் உடனடியாக மின்சாரம் பாய்ந்து மின்சாரக் கசிவு ஏற்பட்டது. இதில் ஓட்டுநரின் கட்டுப்பாட்டை இழந்த டிராக்டர் சாலையோரத்திலிருந்த கால்வாயில் தலைகீழாகக் கவிழ்ந்து விபத்துக்குள்ளானது. இந்த விபத்தில் ஊர்வலத்தில் கலந்துகொண்ட கமலாபூர் பகுதியைச் சேர்ந்த ஹுலுகப்பா மற்றும் தீபக் ஆகிய இரண்டு இளைஞர்கள் பலத்த மின்சாரக் அதிர்ச்சி மற்றும் காயங்களுக்கு உள்ளாயினர்.

காயமடைந்த இருவரும் உடனடியாக ஹோசபேட்டே தாலுகா அரசு மருத்துவமனையில் அனுமதிக்கப்பட்டு, மேல் சிகிச்சைக்காகப் பல்லாரி மருத்துவக் கல்லூரி மருத்துவமனைக்கு மாற்றப்பட்டனர். சம்பவ இடத்தை விஜயநகரா எஸ்பி எஸ்.ஜானவி மற்றும் காவல் அதிகாரிகள் நேரில் பார்வையிட்டு ஆய்வு செய்தனர். இச்சம்பவம் குறித்து ஹோசபேட்டே கிராமப்புற காவல் நிலையத்தில் வழக்குப் பதிவு செய்யப்பட்டுத் தீவிர விசாரணை நடத்தப்பட்டு வருகிறது. பண்டிகைக் காலத்தில் உயரமான அலங்காரங்களுடன் ஊர்வலம் செல்வது குறித்த பாதுகாப்பு விதிமுறைகள் குறித்துப் பொதுமக்கள் மத்தியில் பெரும் கவலை எழுந்துள்ளது.