தமிழக அரசியலில் பெரும் எதிர்பார்ப்புகளை ஏற்படுத்தியுள்ள 2026 சட்டமன்றத் தேர்தலை முன்னிட்டு, தமிழக வெற்றிக் கழகத் தலைவர் விஜய் தனது கூட்டணியின் நிலைப்பாட்டைத் தெளிவுபடுத்தியுள்ளார். சமீபத்திய செய்திகளின்படி பாஜகவுடன் கூட்டணி வைக்கும் பேச்சுக்கே இடமில்லை என்பதை விஜய் தரப்பு திட்டவட்டமாக மறுத்துள்ளது. முன்னதாக, பாஜகவின் கொள்கைகளைத் தனது கட்சிக்கு “கருத்தியல் எதிரி” என்றும், ஆளுங்கட்சியான திமுகவை “அரசியல் எதிரி” என்றும் விஜய் பகிரங்கமாக அறிவித்திருந்தார். இந்த சூழலில், பாஜகவோடு கூட்டணி அமைப்பதாக பரவிய தகவல்கள் முற்றிலும் வதந்தி என த.வெ.க தலைமை விளக்கம் அளித்துள்ளது.
பாஜக தங்களின் கொள்கை எதிரி என்பதில் உறுதியாக இருப்பதாக தவெக செய்தித் தொடர்பாளர் லயோலா மணி உறுதிப்படுத்தியுள்ளார். திருவெற்றியூரில் நடைபெற்ற பொங்கல் விழாவில் பேசிய அவர், தமிழகத்தில் பாஜக வளர்வது பெரும் ஆபத்து அதனை ஒருபோதும் அனுமதிக்க மாட்டோம் என்றார். முன்னதாக பாஜக-வுடன் மென்மையான போக்கை கடைப்பிடிக்கும் தவெக NDA கூட்டணியில் இணையும் என அமைச்சர் TM அன்பரசன் உள்ளிட்டோர் பேசி வந்தனர்.
தற்போது விஜய் தனது கட்சியின் தேர்தல் பணிகளைத் தீவிரப்படுத்தியுள்ளார். 2026 தேர்தலுக்கான தேர்தல் அறிக்கையைத் தயாரிக்க 12 பேர் கொண்ட குழுவை அவர் அமைத்துள்ளார். இந்தக் குழு தமிழகம் முழுவதும் சுற்றுப்பயணம் செய்து பொதுமக்களின் கருத்துகளைக் கேட்டு, அதற்கேற்ப தேர்தல் வாக்குறுதிகளை வடிவமைக்க உள்ளது. “யாரும் எங்களுடன் கூட்டணிக்கு வரலாம், ஆனால் ஆட்சி அதிகாரத்தில் பங்கு தரப்படும்” என்ற புதிய முறையை விஜய் முன்மொழிந்துள்ள போதிலும், பாஜக மற்றும் திமுக ஆகிய இரு கட்சிகளையும் தவிர்த்து ஒரு மாற்று அரசியலை முன்னெடுப்பதிலேயே அவர் உறுதியாக இருப்பதாகத் தெரிகிறது.