தமிழக அரசியல் சூழலில் தமிழக வெற்றிக் கழகத்தின் தலைவர் நடிகர் விஜய் குறித்தும், திமுக ஆட்சியின் செயல்பாடுகள் குறித்தும் பாஜகவைச் சேர்ந்த நடிகை கஸ்தூரி கோவை விமான நிலையத்தில் செய்தியாளர்களிடம் தனது காட்டமான விமர்சனங்களை முன்வைத்துள்ளார். தமிழகத்தில் கடந்த 4.5 ஆண்டுகளில் சட்டம் ஒழுங்கு சீர்குலைந்துள்ளதாகவும், போதைப்பொருள் புழக்கம் மற்றும் பெண்கள் பாதுகாப்பு ஆகியவை பெரும் கவலை அளிப்பதாக உள்ளதாகவும் அவர் குற்றம் சாட்டினார். இதன் காரணமாகவே தேசிய ஜனநாயகக் கூட்டணிக் கட்சிகள் தமிழகம் முழுவதும் போராட்டங்களை நடத்தி வருவதாக அவர் விளக்கமளித்தார்.
விஜய்யின் அரசியல் செயல்பாடுகளை விமர்சித்த கஸ்தூரி, விஜய் மாநாடுகளுக்கு மாநாடு ஒரே பாணியில் பேசி வருவதாகவும், ஆனால் தமிழகத்தில் நிலவும் எந்தவொரு முக்கியப் பிரச்சினைக்கும் அவர் குரல் கொடுப்பதில்லை என்றும் கூறினார். தூய்மைப் பணியாளர்கள், அங்கன்வாடி ஊழியர்கள் சந்திக்கும் சிக்கல்கள் எனப் பல்வேறு விவகாரங்களில் விஜய் மௌனம் காப்பதாகவும், கேரளாவில் கிறிஸ்தவர்கள் தாக்கப்பட்ட சம்பவத்திற்கு மட்டுமே அறிக்கை வெளியிட்ட அவர், தமிழகப் பிரச்சினைகளைத் தவிர்க்கிறார் என்றும் அவர் சுட்டிக்காட்டினார்.
தொடர்ந்து பேசிய அவர், விசிக நிர்வாகி ஆதவ் அர்ஜூனா பேசும் அளவிற்கு கூட விஜய் பொதுப் பிரச்சினைகள் குறித்துப் பேசுவதில்லை என்று விமர்சித்தார். திரையில் அமைதியாக இருந்து வெற்றி பெறுவது போன்ற யுக்திகள் எம்.ஜி.ஆர் காலத்தோடு முடிந்துவிட்டதாகக் குறிப்பிட்ட அவர், தற்போதைய ஜனநாயக சூழலில் மக்களின் பிரச்சினைகளுக்காகக் களமிறங்கிப் பேச வேண்டியது அவசியம் என வலியுறுத்தினார். விஜய்யின் அரசியல் நகர்வுகள் வெறும் “டெம்ப்ளேட்” பேச்சுகளாகவே இருப்பதாக அவர் சாடினார்.
தமிழக அரசு மது விற்பனையை மட்டுமே நம்பி இயங்குவதாகக் குற்றம் சாட்டிய கஸ்தூரி, மக்களைக் குடிநோயாளிகளாக மாற்றிவிட்டு அரசு நிதி திரட்டுவதாகத் தெரிவித்தார். மேலும், உதயநிதி ஸ்டாலினின் செயல்பாடுகள் மற்றும் திமுகவின் தேர்தல் வியூகங்கள் குறித்தும் தனது அதிருப்தியைப் பதிவு செய்த அவர், வரவிருக்கும் தேர்தல்களில் பாஜக மற்றும் அதன் கூட்டணிக் கட்சிகளின் நிலைப்பாடு குறித்து கட்சித் தலைமை முடிவெடுக்கும் என்று கூறி உரையை நிறைவு செய்தார்.