ஜோதிடர் சொன்ன அந்த ஒரு வார்த்தை… கோட்டையில் அலறி அடித்து அறைகளை மாற்றும் அமைச்சர்கள்…. தலைமைச் செயலகத்தில் நடக்கும் பரபரப்பு பின்னணி….!

தமிழக தலைமைச் செயலகத்தின் பிரதான கட்டிடத்தில் செயல்பட்டு வரும் முதல்வர் விஜய்யின் அலுவலகம், விரைவில் நாமக்கல் கவிஞர் மாளிகையின் 10-வது மாடிக்கு மாற்றப்பட இருக்கிறது. இரண்டாவது மாடியில் இருக்கும் முதல்வரின் அறை மற்றும் அவரது செயலாளர்களின் அலுவலகங்கள் வாஸ்துபடி சரியாக அமையவில்லை என முதல்வரின் ஆஸ்தான ஜோதிடர் சுட்டிக்காட்டியதே இந்த திடீர் மாற்றத்திற்குக் காரணம் எனக் கூறப்படுகிறது. சமீபத்தில் நடைபெற்ற ஆட்சியர்கள் மாநாட்டின் போது இந்த 10-வது மாடியின் பிரம்மாண்டத்தையும், அங்கிருந்து தெரியும் வங்கக்கடலின் அழகையும் ரசித்த முதல்வர், தனது ஜாகையை இங்கேயே மாற்ற உடனடியாகச் சம்மதித்துள்ளார்.

முதல்வர் தனது அறையை வாஸ்துக்காக மாற்றுகிறார் என்ற செய்தி காட்டுத்தீ போல் பரவியதைத் தொடர்ந்து, முன்வரிசை அமைச்சர்களும் இதில் தீவிரமாக இறங்கியுள்ளனர். தங்கள் ராசி, நட்சத்திரம் மற்றும் நடப்பு தசாபுத்திகளுக்கு ஏற்ப தங்களது அலுவலக அறைகள் அமைந்திருக்கின்றனவா என்று தங்களின் சொந்த ஜோதிடர்களிடம் ஆலோசனை பெறத் தொடங்கியுள்ளனர். ஜோதிடர்களின் வழிகாட்டுதலின்படி, பல அமைச்சர்கள் தங்களது அறைகளின் திசையையும், அமைப்பையும் மாற்றி அமைக்கும் பணிகளில் தற்போது வேகம் காட்டி வருகின்றனர்.

முதல்வரிடம் அனுமதி பெற்றே அமைச்சர்கள் இந்த வாஸ்து மாற்றங்களைச் செய்து வருகின்றனர். ஆனால், முதல்வர் முதல் அமைச்சர்கள் வரை மேற்கொள்ளும் இந்த ஆடம்பர மாற்றங்களுக்கான ஒட்டுமொத்த செலவுகளும் அரசின் கஜானாவில் இருந்தே எடுக்கப்பட்டு வருகின்றன என்பதுதான் இங்கு பெரும் அதிர்ச்சியை ஏற்படுத்தியுள்ளது. அதிகாரப்பூர்வ பணிகளுக்காகப் பயன்படுத்தப்பட வேண்டிய நிதி, தனிநபர்களின் வாஸ்து நம்பிக்கைகளுக்காகத் தாராளமாகச் செலவிடப்படுவது கோட்டை வட்டாரத்தில் பரபரப்பை ஏற்படுத்தியுள்ளது.

மக்கள் செலுத்தும் வரிப்பணமே அரசு கஜானாவாக இருக்கும் சூழலில், இது போன்ற தேவையற்ற விரயச் செலவுகள் பொதுமக்களின் நிதியை வீணடிக்கும் செயலாகும். “முதல்வர் எவ்வழியோ, அமைச்சர்களும் அவ்வழியே” என்று அரசு அதிகாரிகள் தரப்பிலேயே ஆவேசமும் ஆதங்கமும் எழுந்துள்ளது. வாஸ்து பலன்களைத் தேடி உயரமான மாடிகளுக்கு மாறும் அரசியல் தலைவர்கள், மக்கள் பணத்தின் பொறுப்பையும் உணர்ந்து செயல்பட வேண்டும் என்பதே அனைவரின் எதிர்பார்ப்பாக உள்ளது.