2026 தமிழக சட்டமன்றத் தேர்தலை முன்னிட்டு அரசியல் களம் இப்போதே சூடுபிடிக்கத் தொடங்கியுள்ளது. குறிப்பாக, திமுக கூட்டணியில் தொகுதிப் பங்கீடு தொடர்பாக நிலவும் இழுபறி மற்றும் சலசலப்புகள் விவாதப் பொருளாகியுள்ளன. தமிழக வாழ்வுரிமை கட்சிக்கு மீண்டும் ஒரே ஒரு தொகுதியை மட்டும் ஒதுக்க திமுக முன்வருவதாகக் கூறப்படும் நிலையில், அக்கட்சியின் தலைவர் பண்ருட்டி வேல்முருகன் கடும் அதிருப்தியில் உள்ளதாகத் தெரிகிறது. மக்கள் நீதி மய்யம் மற்றும் தேமுதிக போன்ற கட்சிகளுக்கு கூடுதல் முக்கியத்துவம் அளிக்கப்படுவதாகக் கருதும் தவாக நிர்வாகிகள், திமுகவுக்கு ‘ரெட் சிக்னல்’ காட்டும் வகையில் கூட்டணியிலிருந்து வெளியேறத் தயார் என போர்க்கொடி தூக்கியுள்ளனர்.
திமுக கூட்டணியில் தவாகப் புறக்கணிக்கப்படுவதாகக் கூறப்படும் நிலையில், சாதிவாரி கணக்கெடுப்பு மற்றும் வாரியப் பதவிகள் போன்ற தங்கள் நீண்டகாலக் கோரிக்கைகளை ஆளும் அரசு நிறைவேற்றவில்லை என்பது அக்கட்சியினரின் பிரதான குற்றச்சாட்டாக உள்ளது. வட மாவட்டங்களில் கணிசமான வாக்கு வங்கியைக் கொண்டுள்ள தங்களை, மற்ற சிறிய கட்சிகளுடன் ஒப்பிட்டுப் பார்ப்பது நியாயமல்ல என வேல்முருகன் தரப்பு வாதிடுகிறது. “அவமானங்களைச் சுமந்து கொண்டு கூட்டணியில் நீடிக்க வேண்டிய அவசியமில்லை” என்று மாவட்டச் செயலாளர்கள் கூட்டத்தில் நிர்வாகிகள் ஆக்ரோஷமாகப் பேசியிருப்பது அரசியல் வட்டாரத்தில் பரபரப்பை ஏற்படுத்தியுள்ளது.
இந்த அரசியல் சூழலைத் தனக்குச் சாதகமாக்கிக் கொள்ள அதிமுக பொதுச்செயலாளர் எடப்பாடி பழனிசாமி காய் நகர்த்தி வருகிறார். திமுக கூட்டணியில் ஏற்படும் விரிசலைப் பயன்படுத்தி, வேல்முருகனைத் தனது பக்கம் இழுக்க அவர் ‘பச்சைக்கொடி’ காட்டியுள்ளதாகத் தகவல்கள் வெளியாகியுள்ளன. ஒருகாலத்தில் அரசியல் எதிரிகளாகக் கருதப்பட்ட அன்புமணி ராமதாஸும், வேல்முருகனும் தற்போது இணக்கமான போக்கைக் கடைப்பிடிப்பதால், அவர்கள் இருவரும் அதிமுக கூட்டணியில் கைகோர்ப்பதற்கான சாத்தியக்கூறுகள் அதிகரித்துள்ளன. இது நடந்தால், வட மாவட்டங்களில் அதிமுகவின் பலம் பன்மடங்கு உயர வாய்ப்புள்ளது.
மறுபுறம், காங்கிரஸ் மற்றும் விசிக போன்ற பெரிய கட்சிகளும் கூடுதல் தொகுதிகள் மற்றும் ஆட்சியில் பங்கு கேட்டு திமுகவுக்கு அழுத்தம் கொடுத்து வருகின்றன. இத்தகைய நெருக்கடியான சூழலில், பழைய தோழமைக் கட்சிகளைத் திருப்திப்படுத்துவதா அல்லது புதிய கூட்டாளிகளை அரவணைப்பதா என்ற தர்மசங்கடத்தில் திமுக தலைமை உள்ளது. வேல்முருகன் போன்ற தீவிரமான பேச்சாளர்கள் மற்றும் சமூக வாக்கு வங்கி கொண்ட தலைவர்கள் வெளியேறுவது திமுகவின் வெற்றி வாய்ப்பைப் பாதிக்கக்கூடும் என்பதால், வரும் நாட்களில் தொகுதிப் பங்கீடு பேச்சுவார்த்தைகள் பெரும் திருப்பங்களைச் சந்திக்கும் என எதிர்பார்க்கப்படுகிறது.