“வடக்கில் வன்னியர் வாக்கு.. தெற்கில் தலித் வாக்கு”… ஸ்டாலினின் கணக்கை தவிடு பொடியாக்கும் விஜய்…!

தமிழக அரசியலில் தேர்தல் களம் சூடுபிடித்துள்ள நிலையில், திமுக கூட்டணியில் இருந்து தமிழக வாழ்வுரிமை கட்சி (தவாக) வெளியேறியிருப்பது வட மாவட்டங்களில் பெரும் அரசியல் மாற்றங்களை ஏற்படுத்தும் என எதிர்பார்க்கப்படுகிறது. வேல்முருகன் தலைமையிலான தவாக, விழுப்புரம், கடலூர், திண்டிவனம், பெரம்பலூர் போன்ற மாவட்டங்களில் கணிசமான வன்னியர் வாக்கு வங்கியைத் தன்வசம் வைத்துள்ளது. தனது கோரிக்கைகள் ஏற்கப்படாததால் கூட்டணியை விட்டு விலகுவதாக வேல்முருகன் அறிவித்திருப்பது, தேர்தல் கணக்குகளைத் தலைகீழாக மாற்றியுள்ளது.

வட மாவட்டங்களின் சமூக கட்டமைப்பில் வன்னியர் மற்றும் தலித் வாக்குகள் வெற்றியைத் தீர்மானிக்கும் முக்கிய காரணிகளாக உள்ளன. ஏற்கனவே பாமக அதிமுகவுடன் கைகோர்த்துள்ள நிலையில், வன்னியர் வாக்குகளில் பெரும்பகுதி அங்கு செல்லும் சூழல் நிலவுகிறது. கடந்த முறை வேல்முருகன் திமுக பக்கம் இருந்ததால், வன்னியர் வாக்குகளில் ஒரு பகுதியை திமுகவால் அறுவடை செய்ய முடிந்தது. தற்போது அந்த பலம் இல்லாதது திமுகவுக்கு ஒரு பெரும் பலவீனமாகப் பார்க்கப்படுகிறது.

மற்றொருபுறம், திமுகவின் நம்பிக்கையாக இருந்த தலித் வாக்கு வங்கியிலும் விஜய் தலைமையிலான தமிழக வெற்றிக் கழகம் ஊடுருவத் தொடங்கியுள்ளது. திருமாவளவன் மூலம் தலித் வாக்குகளைத் தக்கவைக்க திமுக முயன்றாலும், இளைஞர்களின் ஆதரவைப் பெற்றுவரும் விஜய் மற்றும் நாம் தமிழர் கட்சியில் இருந்து வெளியேறி தவாக பக்கம் வரும் தமிழ் தேசிய ஆதரவாளர்கள் என வாக்குகள் பலமுனைகளில் சிதறுகின்றன. இது வட மாவட்டங்களில் திமுகவின் கோட்டையை அசைத்துப் பார்க்கும் காரணியாக மாறியுள்ளது.

திமுக தலைமையின் இந்த கூட்டணி அணுகுமுறை மற்றும் தொகுதிப் பங்கீடு முடிவுகள் தற்போதைய சூழலில் சரியானதா என்ற கேள்வியை அரசியல் விமர்சகர்கள் எழுப்புகின்றனர். சமூக ரீதியாகவும், கொள்கை ரீதியாகவும் பலமான பிடிப்பைக் கொண்டுள்ள வேல்முருகன் போன்ற தலைவர்களின் வெளியேற்றம், வரவிருக்கும் தேர்தலில் திமுகவுக்கு வட மாவட்டங்களில் சவாலான சூழலை உருவாக்கியுள்ளது. இத்தகைய பின்னடைவுகளைச் சமாளிக்க திமுக தனது தேர்தல் வியூகத்தை மாற்றியமைக்க வேண்டிய கட்டாயத்தில் உள்ளது.