தமிழக சட்டமன்றத் தேர்தல் முடிவுகள் ஒட்டுமொத்த மாநிலத்தையும் அதிரவைத்துள்ளன. நடிகர் விஜய் தலைமையிலான தமிழக வெற்றிக் கழகம் (தவெக), தான் சந்தித்த முதல் தேர்தலிலேயே 108 இடங்களைக் கைப்பற்றி தனிப்பெரும் கட்சியாக உருவெடுத்துள்ளது. திமுக கூட்டணி 73 இடங்களையும், அதிமுக கூட்டணி 53 இடங்களையும் மட்டுமே பெற்று பின்தங்கியுள்ள நிலையில், விஜய்யின் இந்த அரசியல் பாய்ச்சல் தமிழக அரசியலில் ஒரு புதிய சகாப்தத்தைத் தொடங்கியுள்ளது. தவெக தலைவர் விஜய் தான் போட்டியிட்ட இரண்டு தொகுதிகளிலும் வெற்றி பெற்றுள்ள நிலையில், சட்டப்படி ஒரு தொகுதியை அவர் ராஜினாமா செய்ய வேண்டிய சூழல் உள்ளது.
இந்தத் தேர்தல் களத்தில் அரசியல் கட்சிகளுக்கு இணையாகச் சமூக வலைதளங்களில் ஒரு சுவாரஸ்யமான சவால் வைரலானது. சினிமா விமர்சகர் பிரசாந்த் ரங்கசாமி, “தமிழக வெற்றிக் கழகம் 30 தொகுதிகளுக்கு மேல் வெற்றி பெற்றால் நான் மொட்டை அடித்துக் கொள்கிறேன்” எனத் துணிச்சலாகச் சவால் விடுத்திருந்தார். ஆனால், தேர்தல் முடிவுகள் அவர் கணித்ததை விடப் பல மடங்கு அதிகமாக, 108 இடங்கள் என வந்து நின்றதால், நெட்டிசன்கள் பிரசாந்த்தை சமூக வலைதளங்களில் கடுமையாகக் கலாய்க்கத் தொடங்கினர்.
தன்னுடைய சவாலில் உறுதியாக இருந்த பிரசாந்த், தற்போது சொன்னபடியே மொட்டை அடித்து அந்தப் புகைப்படத்தைத் தனது சமூக வலைதளப் பக்கத்தில் பகிர்ந்துள்ளார். அதில், “சொன்னால் செய்ய வேண்டும். தவெக தலைவர் விஜய் 30 தொகுதிகளுக்கு மேல் தாண்டிவிட்டால் மொட்டை அடிப்பேன் என்று சொன்னேன், அதன்படி இப்போது செய்துள்ளேன். விஜய் சார், நல்லபடியாக ஆட்சி அமைத்து மக்களுக்கு நல்லது செய்யுங்கள்” எனப் பதிவிட்டுத் தனது வாழ்த்துகளையும் தெரிவித்துள்ளார். இக்கட்டான சூழலிலும் வாக்குறுதியைக் காப்பாற்றிய அவரது செயலைப் பலரும் பாராட்டி வருகின்றனர்.
தற்போதைய நிலவரப்படி, தமிழகத்தில் ஆட்சி அமைக்கத் தேவையான 118 இடங்களை எந்த ஒரு தனிப்பட்ட கட்சியும் பெறவில்லை என்பதால் ‘தொங்கு சட்டசபை’ அமையும் சூழல் உருவாகியுள்ளது. 108 இடங்களுடன் முதலிடத்தில் இருக்கும் விஜய், மற்ற கட்சிகளின் ஆதரவுடன் ஆட்சி அமைக்கப் போகிறாரா அல்லது எதிர்க்கட்சியாகச் செயல்படப் போகிறாரா என்பது பெரும் எதிர்பார்ப்பை ஏற்படுத்தியுள்ளது. எது எப்படியோ, பிரசாந்தின் மொட்டை முதல் விஜய்யின் வெற்றி வரை இந்தத் தேர்தல் முடிவுகள் தமிழக வரலாற்றில் நீங்கா இடம்பிடித்துவிட்டன.