நாங்கள் கடத்தல…! “அவரே முழு மனதாக கையெழுத்து போட்டார்” வீடியோ வெளியிட்டு டிடிவிக்கு பதிலடி கொடுத்த தவெக… தமிழக அரசியலில் திக் திக் நிமிடங்கள்..!!

தமிழக அரசியலில் பெரும் பரபரப்பை ஏற்படுத்தியுள்ள எம்எல்ஏ காமராஜ் விவகாரம், தற்போது ‘வீடியோ’ ஆதாரத்தால் புதிய திருப்பத்தைப் பெற்றுள்ளது. அமமுக பொதுச்செயலாளர் டிடிவி தினகரன் தனது கட்சி எம்எல்ஏ கடத்தப்பட்டிருக்கலாம் என்றும், அவர் பெயரில் போலி கடிதம் வழங்கப்பட்டுள்ளதாகவும் ஆளுநரிடம் புகார் அளித்திருந்தார். இதற்கு வலுசேர்க்கும் வகையில், ஆளுநர் மாளிகைக்குச் சென்ற காமராஜும் தான் எந்தக் கடிதமும் வழங்கவில்லை எனத் தெரிவித்திருந்தார். இதனால் தவெக-வின் மீதான விமர்சனங்கள் அரசியல் வட்டாரத்தில் அனல் பறக்கத் தொடங்கின.

தினகரனின் இந்தக் குற்றச்சாட்டுக்குத் தகுந்த பதிலடி கொடுக்கும் விதமாக, தமிழக வெற்றிக் கழகம் (தவெக) தற்போது ஒரு வீடியோவை வெளியிட்டு அதிரடி காட்டியுள்ளது. அந்த வீடியோவில், காமராஜ் எம்எல்ஏ எவ்விதமான கட்டாயமும் இன்றி, மிகுந்த உற்சாகத்துடனும் முழு சுயநினைவுடனும் தவெக-வுக்கு ஆதரவு தெரிவிக்கும் கடிதத்தில் கையெழுத்திடும் காட்சிகள் மிகத் தெளிவாகப் பதிவாகியுள்ளன. இந்த வீடியோ ஆதாரமானது, முன்னதாக காமராஜ் மற்றும் தினகரன் முன்வைத்த “போலி கடிதம்” என்ற புகாரை அப்படியே தலைகீழாக மாற்றி, அவர்கள் மீதே சந்தேகப் பார்வையைத் திருப்பியுள்ளது.

சட்டமன்றத்தில் பெரும்பான்மையை நிரூபிக்க மிகக் குறைந்த அளவிலான எம்எல்ஏக்களின் ஆதரவே தேவைப்படும் நிலையில், தவெக-வின் இந்தத் துணிச்சலான வீடியோ வெளியீடு ஆளுங்கட்சி மற்றும் எதிர்க்கட்சிகளிடையே அதிர்ச்சியை ஏற்படுத்தியுள்ளது. ஒருபுறம் போலி கடிதம் எனப் புகார் அளிக்கப்படும் என அறிவிக்கப்பட்ட நிலையில், மறுபுறம் நேரடி வீடியோ ஆதாரத்தைத் தவெக கையில் எடுத்துள்ளதால் தமிழக அரசியலில் அடுத்தது என்ன நடக்கும் என்ற ‘திக் திக்’ நிமிடங்கள் தொடர்ந்து வருகின்றன. இந்த விவகாரத்தில் ஆளுநர் எடுக்கப்போகும் இறுதி முடிவு, தமிழகத்தின் அடுத்தகட்ட அரசியல் நகர்வுகளைத் தீர்மானிக்கும் காரணியாக மாறியுள்ளது.