தமிழக சட்டசபைத் தேர்தல் 2026-ன் வாக்கு எண்ணிக்கை விறுவிறுப்பான கட்டத்தை எட்டியுள்ள நிலையில், தமிழக அரசியலில் இதுவரை கண்டிராத ஒரு பெரும் மாற்றத்தை நோக்கித் தமிழகம் நகர்ந்து கொண்டிருக்கிறது. “பிறப்பொக்கும் எல்லா உயிர்க்கும்” என்ற கொள்கை முழக்கத்துடன் களம் கண்ட தமிழக வெற்றிக் கழகம் (தவெக), தற்போதைய நிலவரப்படி 108 தொகுதிகளில் முன்னிலை பெற்று அசுர வளர்ச்சி அடைந்துள்ளது. ஏறத்தாழ 35 சதவீத வாக்கு விகிதத்துடன் திமுக மற்றும் அதிமுக ஆகிய திராவிடக் கட்சிகளுக்குப் பெரும் சவாலாக விஜய் உருவெடுத்துள்ளார். ஓய்வுபெற்ற ஐபிஎஸ் அதிகாரி ரவி கணித்ததைப் போலவே தவெக 121 இடங்களை நெருங்கி வருவதால், பனையூர் அலுவலகத்திலும் எஸ்.ஏ.சந்திரசேகர் இல்லத்திலும் கொண்டாட்டங்கள் களைகட்டியுள்ளன.
ஆட்சி அமைக்கத் தேவையான 118 என்ற பெரும்பான்மை இலக்கை தவெக எட்டும் பட்சத்தில், அக்கட்சியின் தலைவர் விஜய் இன்று மாலை அல்லது நாளை காலை ஆளுநரைச் சந்தித்து ஆட்சி அமைக்க உரிமை கோருவார் என எதிர்பார்க்கப்படுகிறது. ஒருபுறம் தொங்கு சட்டசபை ஏற்பட வாய்ப்புள்ளதாக அரசியல் விமர்சகர்கள் கூறினாலும், தற்போது நிலவும் “விஜய் அலை” தவெக-வை தனிப்பெரும் கட்சியாக மாற்றும் என்றே தெரிகிறது. பல தொகுதிகளில் வாக்கு வித்தியாசம் மிகக் குறைவாக இருப்பதால், தவெக தரப்பினர் மிகுந்த எச்சரிக்கையுடன் வாக்கு எண்ணிக்கையைத் தொடர்ந்து கண்காணித்து வருகின்றனர்.
வாக்கு எண்ணிக்கை ஒருபுறம் தீவிரமாக இருக்க, கடந்த சில தினங்களுக்கு முன்பு வெளியான தவெக-வின் உத்தேச அமைச்சரவை பட்டியல் தற்போது மீண்டும் சமூக வலைதளங்களில் வைரலாகி வருகிறது. அதிகாரப்பூர்வ அறிவிப்பு வெளியாகாவிட்டாலும், இந்தப் பட்டியலில் இடம்பெற்றுள்ள பெயர்கள் பெரும் எதிர்பார்ப்பைக் கிளப்பியுள்ளன. அதன்படி, கட்சித் தலைவர் விஜய்க்கு உள்துறை மற்றும் மகளிர் நலத் துறையும், செங்கோட்டையனுக்குப் பொதுப்பணித் துறையும், ஆதவ் அர்ஜுனாவுக்குச் செய்தி மற்றும் விளம்பரத் துறையும் வழங்கப்படலாம் எனக் கூறப்படுகிறது. மேலும் ஆனந்த், அருண்ராஜ், மரிய வில்சன் மற்றும் காரைக்குடி பிரபு ஆகியோருக்கும் முக்கியத் துறைகள் ஒதுக்கப்பட வாய்ப்புள்ளதாக அந்த உத்தேசப் பட்டியல் தெரிவிக்கிறது.
குறிப்பாக, இத்தேர்தலில் பெண்களுக்கு 41 சதவீத ஆதரவு கிடைத்துள்ளதால், அமையவிருக்கும் புதிய அமைச்சரவையில் பெண் பிரதிநிதித்துவத்திற்கு அதிக முக்கியத்துவம் அளிக்கப்படும் எனத் தெரிகிறது. பல ஆண்டுகளாகத் தமிழகத்தை ஆண்டு வந்த திராவிடக் கட்சிகள், தவெக-வின் இந்த அசுர வளர்ச்சியால் பெரும் அதிர்ச்சியில் ஆழ்ந்துள்ளனர். தமிழக மக்களின் ‘மாற்றம்’ என்ற கோரிக்கையை வாக்குகளாக அறுவடை செய்துள்ள விஜய், முதல்வராகப் பதவியேற்கும் தருணத்தைக் கொண்டாட மாநிலம் முழுவதும் அக்கட்சியின் தொண்டர்கள் உற்சாகத்துடன் தயாராகி வருகின்றனர்.