“தவெக-வில் சீட் யாருக்கு?”… புஸ்ஸி ஆனந்த் முதல் சி.டி.ஆர் நிர்மல்குமார் வரை – கசிந்த ரகசிய லிஸ்ட்….!

தமிழக அரசியல் களத்தில் பெரும் எதிர்பார்ப்பை ஏற்படுத்தியுள்ள 2026 சட்டமன்றத் தேர்தலை முன்னிட்டு, நடிகர் விஜய் தலைமையிலான தமிழக வெற்றிக் கழகத்தின் முக்கிய நிர்வாகிகள் போட்டியிட வாய்ப்புள்ள தொகுதிகள் குறித்த உத்தேசப் பட்டியல் தற்போது கசிந்து இணையத்தில் பேசுபொருளாகியுள்ளது. மூன்று தசாப்தங்களுக்கும் மேலாக திரையுலகில் கோலோச்சிய விஜய், தனது மக்கள் செல்வாக்கை அரசியல் வெற்றியாக மாற்றும் நோக்கில் வியூகங்களை வகுத்து வருவதாக அரசியல் விமர்சகர்கள் கருதுகின்றனர்.

இந்த உத்தேசப் பட்டியலின்படி, தவெக தலைவர் விஜய் சென்னை விருகம்பாக்கம் மற்றும் திருச்சி கிழக்கு ஆகிய இரண்டு தொகுதிகளில் போட்டியிட வாய்ப்புள்ளதாகக் கூறப்படுகிறது. தலைநகர் மற்றும் டெல்டா பகுதி என இரண்டிலும் தனது செல்வாக்கை உறுதிப்படுத்த அவர் இந்த முடிவை எடுக்கலாம் எனத் தெரிகிறது. அதேபோல் கட்சியின் பொதுச் செயலாளர் புஸ்ஸி ஆனந்த் கடலூர் தொகுதியிலும்,  முக்கிய நிர்வாகிகளான செங்கோட்டையன் கோபிசெட்டிபாளையத்திலும்,  ஜே.சி.டி பிரபாகர் வில்லிவாக்கம் தொகுதியிலும் களமிறங்கலாம் என எதிர்பார்க்கப்படுகிறது.

மேலும், சமீபத்தில் கட்சியில் இணைந்த மற்றும் முக்கியப் பொறுப்புகளில் உள்ள மற்ற தலைவர்களுக்கான தொகுதிகளும் இந்தப் பட்டியலில் இடம்பெற்றுள்ளன. ஆதவ் அர்ஜுனா திருவள்ளூர் மற்றும் கள்ளக்குறிச்சி ஆகிய தொகுதிகளிலும், சி.டி.ஆர். நிர்மல்குமார் பெரம்பூர் மற்றும் உசிலம்பட்டி தொகுதிகளிலும், அருண்ராஜ் திருச்செங்கோடு தொகுதியிலும், ராஜ்மோகன் பெரம்பலூர் தொகுதியிலும் போட்டியிடத் திட்டமிட்டுள்ளதாகத் தகவல்கள் தெரிவிக்கின்றன.

தமிழகத்தில் திமுக மற்றும் அதிமுக ஆகிய இரு துருவ அரசியலுக்கு இடையே, தவெக ஒரு மாற்று சக்தியாக உருவெடுக்குமா என்பதே அனைவரின் கேள்வியாக உள்ளது. ஒவ்வொரு வீட்டிலும் ஒரு வாக்கு கிடைத்தாலும் தங்களுக்குப் பெரும் வெற்றி கிட்டும் என்ற நம்பிக்கையில் தவெக தலைமை உள்ள நிலையில், இந்தத் தொகுதிப் பங்கீடு மற்றும் வேட்பாளர் தேர்வு குறித்த அதிகாரப்பூர்வ அறிவிப்பு வெளியானால் மட்டுமே கட்சியின் உண்மையான பலம் மற்றும் தேர்தல் வியூகம் முழுமையாகப் புலப்படும்.