தமிழக வெற்றிக் கழகத்தின் தலைவரும், பிரபல நடிகருமான விஜய், வரவிருக்கும் சட்டமன்றத் தேர்தலில் இரண்டு தொகுதிகளில் போட்டியிட வாய்ப்புள்ளதாக வெளியாகி இருக்கும் செய்திகள் அரசியல் வட்டாரத்தில் பெரும் பரபரப்பை ஏற்படுத்தியுள்ளது. தமிழக அரசியலில் புதிய சக்தியாக உருவெடுத்துள்ள விஜய், தனது கட்சியின் பலத்தை நிரூபிக்கும் வகையில் தீவிரமான தேர்தல் பணிகளில் ஈடுபட்டு வருகிறார். அவருக்குள்ள கோடிக்கணக்கான ரசிகர்களின் ஆதரவும், பொதுமக்களிடையே இருக்கும் வரவேற்பும் தவெகவிற்கு சுமார் 15 சதவீதத்திற்கும் அதிகமான வாக்குகளைப் பெற்றுத் தரும் என்று அரசியல் விமர்சகர்கள் கணித்துள்ளனர்.
தேர்தல் களத்தில் தனித்துப் போட்டியிட அல்லது கூட்டணி அமைக்க தவெக பல்வேறு முயற்சிகளை மேற்கொண்டு வருகிறது. குறிப்பாக, காங்கிரஸை தங்கள் பக்கம் இழுக்க விஜய் தரப்பு முனைப்பு காட்டி வருவதாகவும், திமுகவுடனான கூட்டணி அமையாத பட்சத்தில் காங்கிரஸ் தவெகவுடன் இணைய வாய்ப்புள்ளதாகவும் கூறப்படுகிறது. இதற்கிடையில், கட்சியின் தேர்தல் வியூகத்தின் ஒரு பகுதியாக விஜய் எந்தெந்த தொகுதிகளில் போட்டியிடுவார் என்ற எதிர்பார்ப்பு அதிகரித்துள்ளது. முன்னதாக வேளச்சேரி, வேதாரண்யம் போன்ற தொகுதிகளின் பெயர்கள் அடிபட்ட நிலையில், தற்போது திருச்சி கிழக்கு மற்றும் பெரம்பூர் ஆகிய தொகுதிகளில் அவர் கவனம் செலுத்தி வருவதாகத் தகவல்கள் கசிந்துள்ளன.
குறிப்பாக, திருச்சி கிழக்கு மற்றும் பெரம்பூர் ஆகிய இரண்டு தொகுதிகளையும் விஜய் உறுதி செய்துள்ளதாகக் கூறப்படும் நிலையில், அங்கு தவெக நிர்வாகிகள் தேர்தல் பணிகளை மிக வேகமாகத் தொடங்கியுள்ளனர். இந்த இரண்டு தொகுதிகளிலும் விஜய்க்கு மிகப்பெரிய ஆதரவு தளம் இருப்பதால், அங்கிருந்து போட்டியிடுவது பாதுகாப்பானது மற்றும் வெற்றியை உறுதி செய்யும் என்று கட்சித் தலைமை கருதுகிறது. விஜயின் இந்த இரட்டைத் தொகுதி முடிவு தமிழக அரசியலில் மற்ற பெரிய கட்சிகளுக்கும் சவாலாக அமையும் என எதிர்பார்க்கப்படுகிறது.