“12 முறை தோற்ற தீர்ந்துபோன சக்தி”… இடைத்தேர்தல் வேளையில் எடப்பாடி பழனிசாமிக்கு விஜய்யின் தவெக கொடுத்த ‘ஷாக்’ அணுகுண்டு….!

தமிழகத்தில் காலியாக உள்ள மதுராந்தகம் மற்றும் தாராபுரம் ஆகிய இரு சட்டமன்றத் தொகுதிகளுக்கான இடைத்தேர்தல் வரும் அக்டோபர் 6-ஆம் தேதி நடைபெற உள்ளது. அதிமுக வசமிருந்த இந்தத் தொகுதிகளின் சட்டமன்ற உறுப்பினர்கள் 6 பேர் வரை தமிழக வெற்றிக் கழகத்தில் இணைந்ததைத் தொடர்ந்து, இத்தொகுதிகளை மீண்டும் கைப்பற்ற எடப்பாடி பழனிசாமி தலைமையிலான அதிமுக தீவிரப் பிரச்சாரத்தில் ஈடுபட்டு வருகிறது. இந்தச் சூழலில், தேர்தல் களம் சூடுபிடித்துள்ள நிலையில், தவெக தனது அதிகாரப்பூர்வ எக்ஸ் (ட்விட்டர்) பக்கத்தில் வெளியிட்டுள்ள அறிக்கை அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது.

தங்களது எக்ஸ் பதிவில், “மக்களால் 12 முறையாகத் தொடர்ந்து தேர்ந்தெடுக்கப்படாத, தீர்ந்து போன சக்தியின் சில கொள்கைகளும் செயல்பாடுகளும்!” என்று குறிப்பிட்ட தவெக, துரோகம், முதுகுக்குத்து மற்றும் நேர்மையற்ற தன்மை ஆகிய தலைப்புகளின் கீழ் கடுமையான விமர்சனங்களை முன்வைத்துள்ளது. பாஜகவுடன் மீண்டும் கூட்டணி அமைத்து மக்களை ஏமாற்றியது, நீட் தேர்வை தமிழகத்திற்குக் கொண்டு வந்து மாணவர் வாழ்க்கையோடு விளையாடியது, கட்சியின் நிறுவனர்களுக்கே துரோகம் இழைத்து சுயநலத்துடன் செயல்படுவது எனப் பல்வேறு குற்றச்சாட்டுகளைப் பட்டியலிட்டுள்ளது. மேலும், எதிரியை நேருக்கு நேர் எதிர்கொள்ளத் திராணியின்றி கட்டப்பஞ்சாயத்து மூலம் ஆட்களை விலைக்கு வாங்க முயல்வது பயத்தின் வெளிப்பாடே என்றும் சாடியுள்ளது.

கட்சி தொடங்கிய காலம் முதலே திமுகவையே பிரதான எதிரியாகச் சித்தரித்து வந்த விஜய், அதிமுகவின் பெயரை நேரடியாகக் குறிப்பிடாமல் “மற்றும் பலர்” என்ற சொல்லாடலையே பயன்படுத்தி விமர்சித்து வந்தார். தற்போது இடைத்தேர்தல் நெருங்கும் வேளையில், அதிமுகவின் பெயரை நேரடியாகக் குறிப்பிடாவிட்டாலும், “12 முறை தேர்ந்தெடுக்கப்படாத சக்தி” என்றும், பாஜக கூட்டணி மற்றும் உள் அரசியல் நிகழ்வுகளைச் சுட்டிக்காட்டியும் அதிமுகவையே நேரடியாக இலக்கு வைத்துள்ளதாக அரசியல் விமர்சகர்கள் கருதுகின்றனர். இது தவெகவின் தேர்தல் வியூகத்தில் ஒரு முக்கிய மாற்றமாகப் பார்க்கப்படுகிறது.

முக்கியத்துவம் வாய்ந்த இந்த இரு தொகுதிகளையும் தக்கவைத்துத் தன் செல்வாக்கை நிரூபிக்க அதிமுக நிர்வாகிகளும் எடப்பாடி பழனிசாமியும் தீவிர களப்பணியில் ஈடுபட்டு வரும் வேளையில், தவெகவின் இந்தத் தாக்குதல் தேர்தல் களத்தின் வெப்பத்தை மேலும் உயர்த்தியுள்ளது. திமுக மற்றும் தவெகவின் சவால்களை எதிர்கொண்டு அதிமுக இத்தொகுதிகளைத் தக்கவைக்குமா அல்லது தவெகவின் இந்த அதிரடி விமர்சனங்கள் தேர்தல் முடிவுகளில் தாக்கத்தை ஏற்படுத்துமா என்பது வரும் அக்டோபர் 6-ஆம் தேதி வாக்குப்பதிவிற்குப் பின்னரே தெரியவரும்.