தமிழகத்தில் வெளிச்சந்தையில் இருந்து ஒரு யூனிட் மின்சாரத்தை அதிக விலைக்கு வாங்கிய விவகாரமும், உடன்குடி அனல்மின் திட்டத்தை தனியார் வசம் தாரைவார்க்கப் போட்ட ரகசிய உத்தரவும் பெரும் புயலைக் கிளப்பியுள்ளன. இந்தச் சூழலில், எதிர்க்கட்சிகள் மற்றும் தொழிற்சங்கங்களின் கடும் எதிர்ப்புகளை மீறி, தமிழக அரசு அடுத்த அதிரடி முடிவாக 4-வது முறையாக புதிய டெண்டரை வெளியிட்டுள்ளது. வரும் நவம்பர் முதல் ஜனவரி வரையிலான குளிர்காலத் தேவைக்காக, மொத்தம் 4,900 மெகாவாட் மின்சாரத்தை குறுகிய கால ஒப்பந்த அடிப்படையில் தனியாரிடம் இருந்து வாங்க இந்த டெண்டர் கோரப்பட்டுள்ளது.
பொதுவாக குளிர்காலத்தில் ஏசி பயன்பாடு குறைந்து, தமிழகத்தின் ஒட்டுமொத்த மின் தேவை குறையும் என்பதே விதியாகும். ஆனால், இக்காலக்கட்டத்திலும் கூட அரசு தனது சொந்த மின் உற்பத்தி நிலையங்களை முழுமையாக இயக்காமல், தனியாரிடம் கையேந்த முடிவு செய்துள்ளது கேள்விகளை எழுப்பியுள்ளது. ஏற்கனவே ஒரு யூனிட்டுக்கு ரூ. 31 முதல் ரூ. 37 வரை விலை கொடுத்து தனியார் ஆலைகளுக்கு வாரி வழங்கிய நிலையில், தற்போதும் அதே தனியார் முதலாளிகள் நிர்ணயிக்கும் அதிகப்படியான தொகையிலேயே மின்சாரம் வாங்கப்பட உள்ளது பொதுமக்களிடையே அதிர்ச்சியை ஏற்படுத்தியுள்ளது.
தொடர்ந்து மேற்கொள்ளப்படும் இது போன்ற தவறான முடிவுகளால், ஏற்கனவே இரண்டரை லட்சம் கோடி ரூபாய் கடனில் தத்தளிக்கும் மின்சார வாரியம் பல ஆயிரம் கோடி ரூபாய் இழப்பை சந்திக்கும் அபாயம் ஏற்பட்டுள்ளது. மின்வாரியம் பொதுமக்களுக்கு ஒரு யூனிட் மின்சாரத்தை மிகக் குறைந்த விலைக்கே விநியோகம் செய்யும் நிலையில், தனியாரிடம் இருந்து பலமடங்கு கூடுதல் விலைக்கு மின்சாரம் வாங்குவதால் ஏற்படும் பெருத்த நஷ்டம் இறுதியில் பொதுமக்கள் தலையில்தான் கட்டப்படும் என்று அச்சம் தெரிவிக்கப்படுகிறது.
“ஊழல் இல்லாத வெளிப்படையான புதிய அரசியல் தருவோம்” என்று கூறி ஆட்சிக்கு வந்த முதலமைச்சர் விஜய், மின்சாரத் துறையில் நடக்கும் இந்த முறைகேடுகள் குறித்து மௌனம் காப்பது விமர்சனங்களைச் சந்தித்துள்ளது. அரசுக்கு சொந்தமான திட்டங்களை தனியாருக்கு மாற்றுவதும், அதே தனியாரிடம் கொள்ளை விலைக்கு மின்சாரம் வாங்குவதும் மிகப்பெரிய முறைகேடு என்று எதிர்க்கட்சிகள் போர்க்கொடி தூக்கியுள்ளன. எனவே, மக்கள் வரிப்பணத்தை தனியாருக்கு தாரைவார்க்கும் இந்த 4-வது டெண்டரை உடனடியாக ரத்து செய்துவிட்டு, மின்சார வாரியத்தின் செயல்பாடுகள் குறித்து முழுமையான வெள்ளை அறிக்கை வெளியிட வேண்டும் என்பதே ஒட்டுமொத்த தமிழகத்தின் கோரிக்கையாக உள்ளது.