தமிழக வெற்றிக் கழகத்தின் (TVK) நிர்வாகிகள் அடுத்தடுத்து குற்றச்சாட்டுகளில் சிக்கி வருவது சமூக வலைதளங்களில் பெரும் விவாதப் பொருளாக மாறியுள்ளது. தூத்துக்குடியில் சட்டவிரோதமாக ஆன்லைன் லாட்டரி விற்பனையில் ஈடுபட்டு வந்த தவெக நிர்வாகி ராம்குமார் என்பவரைப் போலீசார் அதிரடியாகக் கைது செய்துள்ளனர். இந்த சட்டவிரோத கும்பலில் தொடர்புடைய மேலும் சிலரை போலீசார் தீவிரமாக வலைவீசி தேடி வருகின்றனர். கட்சியின் முக்கிய பொறுப்பில் இருக்கும் ஒருவரே இத்தகைய சட்டவிரோத செயலில் ஈடுபட்டு பிடிபட்டிருப்பது தவெக தொண்டர்கள் மத்தியில் அதிர்ச்சியை ஏற்படுத்தியுள்ளது.
இதற்கிடையில், கடந்த சில நாட்களுக்கு முன்னர் ஸ்ரீவைகுண்டத்தில் தவெக பெண் நிர்வாகி ஒருவரைக் காரில் கடத்தி கூட்டுப் பாலியல் வன்கொடுமை செய்த புகாரில், அக்கட்சியைச் சேர்ந்த இரண்டு நிர்வாகிகள் கைது செய்யப்பட்டுள்ளனர். இந்த அடுத்தடுத்த கைது நடவடிக்கைகள் மற்றும் குற்றச்சாட்டுகள் சமூக வலைதளங்களில் (SM) கடுமையான விமர்சனத்திற்கு ஆளாகியுள்ளன. தமிழ்நாட்டில் புதிய ஆட்சியை அமைத்து மாற்றத்தை ஏற்படுத்துவதாகக் கூறும் கட்சியின் நிர்வாகிகள், இத்தகைய தொடர் அத்துமீறல்களில் ஈடுபடுவது பொதுமக்களிடையேயும் அரசியல் வட்டாரத்திலும் பெரும் பரபரப்பை ஏற்படுத்தியுள்ளது.