தமிழக அரசியல் களத்தில் தற்போதைய மிக முக்கிய விவாதப் பொருளாக மாறியிருப்பது, தமிழக வெற்றிக் கழகத்தின் (த.வெ.க) தலைவரும் முதல்வருமான விஜய், தனது சிறப்புச் செயலாளர் மற்றும் அரசியல் ஆலோசகர் நியமன விவகாரத்தில் சந்தித்துள்ள அரசியல் பின்னடைவும், அதனால் ஏற்பட்டுள்ள கடுமையான மனவருத்தமும்தான். கட்சியின் மிக முக்கியப் பொறுப்பில் அமர்த்தப்பட்ட ஜோதிடர் ரத்தன் பண்டிட், பொதுமக்கள் மற்றும் அரசியல் விமர்சகர்களின் கடுமையான எதிர்ப்புகள் காரணமாக சில நாட்களிலேயே பதவியிலிருந்து நீக்கப்பட்டார். இந்த விவகாரம், கட்சித் தொடங்கிய ஆரம்பக் கட்டத்திலேயே முதல்வர் விஜயை பெரும் சங்கடத்திற்குள் தள்ளியுள்ளது.
சமீபகாலமாகவே தமிழக வெற்றிக் கழகத்தின் தலைவர் விஜய்யின் அரசியல் நகர்வுகள் உற்றுநோக்கப்பட்டு வரும் சூழலில், விஜய்யின் தனிப்பட்ட அரசியல் ஆலோசகராக ஜோதிடர் ரிக்கி ரத்தன் பண்டிட் நியமிக்கப்பட்ட செய்தி அரசியல் வட்டாரத்தில் பெரும் புயலைக் கிளப்பியது. பகுத்தறிவு, சமூக நீதி, மற்றும் ஆன்மிக அரசியல் எனப் பல்வேறு கொள்கை விளக்கங்களுக்கு இடையே, ஒரு ஜோதிடரை விஜய் தன் பக்கத்தில் முக்கிய ஆலோசகராக வைத்திருப்பது கட்சியின் இமேஜைப் பாதிக்கும் என சமூக வலைத்தளங்களிலும் ஊடகங்களிலும் கடுமையான விமர்சனங்கள் வெடித்தன. இதன் காரணமாகவே அவர் உடனடியாக அந்தப் பதவியிலிருந்து நீக்கப்பட வேண்டிய சூழல் உருவானது.
ரிக்கி ரத்தன் பண்டிட் ஒன்றும் தமிழக அரசியலுக்குப் புதியவர் அல்ல. ஒரு காலத்தில் மறைந்த முன்னாள் முதல்வர் ஜெயலலிதாவின் போயஸ் கார்டன் வட்டாரத்தில் மிக நெருக்கமாக வலம் வந்தவர். ஜெயலலிதாவின் நம்பிக்கையைப் பெற்றிருந்த இவர், பின்னர் அ.தி.மு.க-வின் முன்னாள் நாடாளுமன்ற உறுப்பினர் ஒருவரின் மூலமாக டெல்லி அரசியல் வட்டாரத்திற்குள் நுழைந்தார். அந்த முன்னாள் எம்.பி, பாரதிய ஜனதா கட்சியின் மிக முக்கியப் புள்ளியும், எல்.கே. அத்வானிக்கு நெருக்கமானவருமான ஒரு நாடாளுமன்ற உறுப்பினரிடம் இந்த ஜோதிடரை அறிமுகம் செய்து வைத்துள்ளார். அந்தப் பா.ஜ.க பிரமுகர் மூலமாக, நேரடியாக அத்வானியின் இல்லத்திற்கே அழைத்துச் செல்லப்பட்டு டெல்லி அரசியலிலும் தடம் பதித்தார்.
மன்மோகன் சிங் பிரதமராக இருந்த காலகட்டத்தில், பா.ஜ.க-வின் மூத்த தலைவரான எல்.கே. அத்வானிக்கு பிரதமர் நாற்காலியின் மீது அலாதியான ஆசை இருந்தது. இதைச் சாதகமாகப் பயன்படுத்திக் கொண்ட ஜோதிடர் ரத்தன் பண்டிட், அத்வானியின் ஜாதகத்தைக் கணித்து, “அடுத்த பிரதமர் நீங்கள் தான்” என ஆணித்தரமாகக் கூறியுள்ளார். ஆனால், 2009 பொதுத்தேர்தலிலும் காங்கிரஸ் கட்சியே மீண்டும் ஆட்சி அமைத்ததால் அந்த ஜோதிடம் பலிக்கவில்லை. ஜோதிடம் பொய்த்த நிலையிலும் அசராத ரத்தன் பண்டிட், டெல்லியிலேயே முகாமிட்டு அங்குள்ள பல முன்னணி தொழிலதிபர்களுக்கு ஜாதகம் பார்த்துத் தன் செல்வாக்கை டெல்லி முதல் சென்னை வரை பலமாக வளர்த்துக் கொண்டார்.
இப்படிப்பட்ட பின்னணி கொண்ட ரத்தன் பண்டிட்டைத் தனது சிறப்புச் செயலாளராக விஜய் நியமித்ததும், அதற்கு எழுந்த எல்லை மீறிய விமர்சனங்களால் அவரை அதிரடியாக நீக்கியதும் தற்போது த.வெ.க-விற்குள் பெரும் சலசலப்பை ஏற்படுத்தியுள்ளது. இந்த திடீர் நீக்கத்தால் ஜோதிடர் கடுமையான அதிருப்தியில் இருப்பதாகக் கூறப்படும் அதே வேளையில், தமக்கு பல்வேறு முக்கிய ஆலோசனைகளை வழங்கியவருக்குப் பிரதிபலனாக எந்த ஒரு அங்கீகாரமும் செய்ய முடியாமல் போய்விட்டதே என்று முதல்வர் விஜய்யும் கடும் அப்செட்டில் இருப்பதாகத் தெரிகிறது. விஜய்யின் அரசியல் பயணத்தின் ஆரம்பக்கட்டத்திலேயே ஏற்பட்டுள்ள இந்த ‘ஜோதிட’ சர்ச்சை, தமிழக அரசியல் களத்தை சூடாக்கியுள்ளது.