“தாய்மாமன் தங்க மோதிரம் மாதிரி”… இது புது பிளானா?… பொங்கல் வேட்டி-சேலை விவகாரத்தில்… கொதித்தெழுந்த டிடிவி தினகரன்…!

பொங்கல் பண்டிகையை முன்னிட்டு குடும்ப அட்டைதாரர்களுக்கு விலையில்லா வேட்டி மற்றும் சேலைகள் வழங்கும் திட்டத்திற்கான உற்பத்தி அனுமதியை வழங்குவதில் அரசு தாமதம் செய்து வருவதாக அமமுக பொதுச் செயலாளர் டிடிவி தினகரன் குற்றம்சாட்டியுள்ளார். வழக்கமாக ஒவ்வோர் ஆண்டும் ஜூலை மாதத்திலேயே நெசவாளர்களுக்கு உற்பத்தி அனுமதி வழங்கப்பட்டு வந்த நிலையில், ஆகஸ்ட் மாதம் முடியும் தருவாயிலும் அனுமதி வழங்கப்படாதது கண்டனத்திற்குரியது என்று அவர் குறிப்பிட்டுள்ளார்.

புதிய ரக நூலில் வேட்டி, சேலைகளை உற்பத்தி செய்ய முதற்கட்டமாக ரூ.300 கோடி நிதி ஒதுக்கப்பட்டு அரசாணை பிறப்பிக்கப்பட்டுள்ள போதும், உற்பத்தியைத் தொடங்க அனுமதி வழங்கப்படவில்லை என்று தினகரன் சுட்டிக்காட்டியுள்ளார். குறுகிய காலத்தில் உற்பத்தி, நெசவு, தரப் பரிசோதனை மற்றும் விநியோகம் போன்ற பல்வேறு பணிகளை முடிக்க வேண்டியுள்ளதால், அரசின் இந்த அலட்சியப் போக்கு இத்தொழிலை நம்பியுள்ள சுமார் 3 லட்சம் நெசவாளர் குடும்பங்களின் வாழ்வாதாரத்தைக் கேள்விக்குறியாக்கியுள்ளதாகத் தெரிவித்தார்.

மக்களுக்கு வழங்கும் விலையில்லா வேட்டி, சேலைத் திட்டத்திலும் நிபந்தனைகளை விதித்து பயனாளிகளின் எண்ணிக்கையைக் குறைக்க அரசு திட்டமிட்டுள்ளதா என்ற சந்தேகம் எழுந்துள்ளது. மேலும், ‘தாய்மாமன் தங்க மோதிரம்’ திட்டம் போன்றே இத்திட்டத்தையும் வெளிமாநில நிறுவனங்களுக்கு தாரை வார்க்க அரசு முடிவு செய்துள்ளதா என கேள்வி எழுப்பிய அவர், பொங்கல் பண்டிகைக்கு முன்பாகவே பொருட்கள் மக்களைச் சென்றடையவும், நெசவாளர்களின் நலனைக் காக்கவும் உடனடியாக உற்பத்தி அனுமதி வழங்குமாறு வலியுறுத்தியுள்ளார்.