அதிமுக கூட்டணியில் டி.டி.வி. தினகரன் தலைமையிலான அமமுக இணைவது குறித்த தகவல்கள் அரசியல் வட்டாரத்தில் பெரும் பரபரப்பை ஏற்படுத்தியுள்ளன. வரும் சட்டமன்றத் தேர்தலில் அதிமுக கூட்டணியில் புதிய கட்சிகள் இணையும் என்று அக்கட்சியின் பொதுச்செயலாளர் எடப்பாடி பழனிசாமி சமீபத்தில் தெரிவித்திருந்தார். இந்நிலையில், அமமுகவை கூட்டணியில் சேர்க்க பாஜக தலைமை வலியுறுத்தியதாகவும், அதற்கு எடப்பாடி பழனிசாமி தற்போது சம்மதம் தெரிவித்துள்ளதாகவும் கூறப்படுகிறது. குறிப்பாக, சோளிங்கர், பாபநாசம், ஆண்டிப்பட்டி, சாத்தூர் மற்றும் தாம்பரம் உள்ளிட்ட ஏழு தொகுதிகளை அமமுகவிற்கு ஒதுக்க அதிமுக முன்வந்துள்ளதாகத் தகவல்கள் வெளியாகியுள்ளன.
இந்தக் கூட்டணி குறித்த இறுதி முடிவுகள் இன்னும் ஓரிரு நாட்களில் முறைப்படி அறிவிக்கப்படும் என எதிர்பார்க்கப்படுகிறது. நீண்ட காலமாக எடப்பாடி பழனிசாமி மற்றும் டி.டி.வி. தினகரன் இடையே அரசியல் ரீதியான மோதல் நிலவி வந்த நிலையில், தற்போது தேர்தலை முன்னிட்டு இருவரும் கைகோர்க்க முன்வந்திருப்பது தமிழக அரசியலில் முக்கிய திருப்பமாகப் பார்க்கப்படுகிறது. இந்த இணைப்பின் மூலம் தென் மாவட்டங்களில் அதிமுகவின் வாக்கு வங்கி வலுப்பெறும் என்றும், ஆளுங்கட்சிக்கு எதிராக ஒரு வலுவான கூட்டணியை அமைக்க அதிமுக திட்டமிட்டுள்ளதாகவும் அரசியல் விமர்சகர்கள் கருத்து தெரிவித்து வருகின்றனர்.