அமெரிக்க அதிபர் டொனால்ட் டிரம்ப், ஈரானுடனான தற்போதைய போர்ச் சூழலில் எவ்வித பேச்சுவார்த்தைக்கும் இடமில்லை என்றும், அந்நாடு “நிபந்தனையற்ற முறையில் சரணடைவது” (Unconditional Surrender) மட்டுமே ஒரே வழி என்றும் அதிரடியாக அறிவித்துள்ளார். மார்ச் 6, 2026 அன்று தனது சமூக வலைதளப் பக்கத்தில் பதிவிட்டுள்ள அவர், ஈரான் முழுமையாகச் சரணடைந்தால் மட்டுமே அந்நாட்டின் எதிர்காலம் குறித்து ஆலோசிக்கப்படும் என்று திட்டவட்டமாகத் தெரிவித்துள்ளார்.
ஈரான் சரணடைந்த பிறகு, அந்நாட்டிற்கு ஒரு “சிறந்த மற்றும் ஏற்றுக்கொள்ளத்தக்கத் தலைவரை” (Great & Acceptable Leader) தேர்வு செய்த பின், அமெரிக்காவும் அதன் நட்பு நாடுகளும் இணைந்து ஈரானை மீட்டெடுக்கும் பணிகளில் ஈடுபடும் என்று டிரம்ப் கூறியுள்ளார். “மேக் ஈரான் கிரேட் அகெய்ன்” (MIGA) என்ற முழக்கத்தின் மூலம் ஈரானின் பொருளாதாரத்தை மீண்டும் பலப்படுத்த உதவுவோம் என்றும் அவர் உறுதியளித்துள்ளார்.
அமெரிக்கா மற்றும் இஸ்ரேல் படைகள் ஈரானின் முக்கிய ராணுவ இலக்குகளைத் தாக்கி வரும் நிலையில், ஈரானின் வான் பாதுகாப்பு மற்றும் கடற்படை பலம் கணிசமாக அழிக்கப்பட்டுள்ளதாக டிரம்ப் குறிப்பிட்டுள்ளார். இதற்கிடையில், சில நாடுகள் மத்தியஸ்த முயற்சிகளைத் தொடங்கியுள்ளதாக ஈரான் அதிபர் மசூத் பெசெஷ்கியன் கூறினாலும், டிரம்ப் சரணடைவதைத் தவிர வேறு எதற்கும் உடன்படப் போவதில்லை என்பதில் உறுதியாக உள்ளார்.