அமெரிக்காவில் படிச்சிட்டு அங்கேயே வேலை பாக்கணுமா?…. இனி 1,00,000 டாலர் கட்டணம்… இந்திய மாணவர்களுக்கு டொனால்ட் டிரம்ப் வைத்த மிகப்பெரிய ஆப்பு….!

அமெரிக்க அதிபர் டொனால்ட் டிரம்ப் தனது இரண்டாவது ஆட்சிப் பொறுப்பேற்றது முதல், எதிர்பாராத பல கடுமையான நடவடிக்கைகளையும் அறிவிப்புகளையும் தீவிரமாக வெளியிட்டு வருகிறார். குறிப்பாக, வெளிநாடுகளில் இருந்து அமெரிக்காவிற்குப் படிக்கவும் வேலை செய்யவும் வந்தவர்களை இலக்காகக் கொண்டு அவரது நிர்வாகம் இயங்கி வருகிறது. முறையான விசா ஆவணங்கள் இல்லாதவர்களைத் தாய்நாட்டிற்குத் திருப்பி அனுப்பும் நடவடிக்கையில் பல இந்தியர்களும் பாதிக்கப்பட்டுள்ளனர். உலகரங்கில் ஒருபுறம் ஈரான் மீதான போர்ச் சூழல் தொடர்ந்து நீடித்து வரும் நிலையில், மற்றொருபுறம் ரஷ்யாவிடமிருந்து கச்சா எண்ணெய் வாங்கும் இந்தியா மற்றும் சீனா போன்ற நாடுகளின் மீது 100 சதவீத அபராத வரி விதிப்பதற்கான மசோதா அமெரிக்க நாடாளுமன்றத்தில் விரைவில் தாக்கல் செய்யப்படவுள்ளதாகக் கூறப்படுகிறது.

இந்த அதிரடி நடவடிக்கைகளின் தொடர்ச்சியாக, அமெரிக்காவில் கல்வியை முடிக்கும் வெளிநாட்டு மாணவர்கள் அங்கேயே தங்கிப் பணியாற்றுவதற்கு ஏதுவாகப் புதிய கட்டண முறையைக் கொண்டுவர டிரம்பின் நிர்வாகம் ஆலோசித்து வருகிறது. இதன்படி, படிப்பை முடித்து அமெரிக்காவிலேயே வேலை செய்ய விரும்பும் மாணவர்கள் சுமார் 1,00,000 டாலர் (இந்திய மதிப்பில் சுமார் 95 லட்சம் ரூபாய்) கட்டணமாகச் செலுத்த நேரிடும் என்று தகவல்கள் வெளியாகியுள்ளன. இந்த அதிகளவிலான தொகையை மாணவர்களே நேரடியாகச் செலுத்த வேண்டுமா அல்லது அவர்களைப் பணியமர்த்தும் நிறுவனங்கள் ஏற்றுக்கொள்ள வேண்டுமா என்பது குறித்த இறுதி முடிவை அமெரிக்க அரசு இன்னும் அதிகாரப்பூர்வமாக அறிவிக்கவில்லை என்றாலும், இந்த செய்தி அமெரிக்காவில் பயிலும் இந்திய மாணவர்கள் உட்படப் பல வெளிநாட்டு மாணவர்களிடையே பெரும் அதிர்ச்சியையும் கவலையையும் ஏற்படுத்தியுள்ளது.