அமெரிக்காவிற்கும் ஈரானுக்கும் இடையிலான அரசியல் பதற்றங்கள் உச்சமடைந்துள்ள நிலையில், ஈரானைப் பொருளாதார ரீதியாகத் தனிமைப்படுத்தும் நோக்கில் டொனால்ட் ட்ரம்ப் தலைமையிலான அமெரிக்க நிர்வாகம் தீவிர நடவடிக்கைகளை மேற்கொண்டுள்ளது. இதன் ஒரு பகுதியாக, அமெரிக்க கருவூலச் செயலாளர் ஸ்காட் பெசண்ட் “ஆபரேஷன் எகனாமிக் அவுட்காஸ்ட்” என்ற விரிவான பொருளாதார நடவடிக்கை திட்டத்தை அறிவித்துள்ளார். ஈரானிய ஆட்சியின் ஸ்திரத்தன்மையற்ற நடவடிக்கைகளுக்கு நிதி ஆதாரமாக விளங்கும் பெட்ரோலியம் மற்றும் பெட்ரோலிய வேதிப் பொருட்களின் வணிகத்தைத் தடுப்பதே இந்நடவடிக்கையின் முக்கிய நோக்கமாகும்.
இந்தத் தீவிர நடவடிக்கையின் தொடர்ச்சியாக, ஈரானில் இருந்து பெட்ரோலியப் பொருட்களைத் தெரிந்து இறக்குமதி செய்ததாகவும், அதற்கான பரிவர்த்தனைகளில் ஈடுபட்டதாகவும் கூறி நான்கு இந்திய நிறுவனங்கள் மீது அமெரிக்கா பொருளாதாரத் தடைகளை விதித்துள்ளது. சதாசிவ் ஓவர்சீஸ் லிமிடெட் நிறுவனம் சுமார் 69 மில்லியன் டாலர் மதிப்பிலும், பிபி சாஃப்டெக் பிரைவேட் லிமிடெட் மற்றும் பிரகிருதியின் இன்ஃப்ரா இம்பெக்ஸ் பிரைவேட் லிமிடெட் ஆகிய நிறுவனங்கள் தலா 25 மில்லியன் டாலர் மதிப்பிலும் பொருட்களை இறக்குமதி செய்ததாகக் குற்றம்சாட்டப்பட்டுள்ளது. மேலும், இந்த இறக்குமதிகளுக்கு வழிவகுத்த போர்டேஜ் பார்ட்னர்ஸ் எல்.எல்.பி என்ற சுங்க வரித் தரகு நிறுவனம் மற்றும் இந்தியக் குடிமக்களான பிரசாந்த் கார்க், இந்திரிஸ்மியா அஷ்ரஃப்மியா ஷேக், ஹரிஷ் ராமச்சந்திர ரங்கி ஆகிய தனிநபர்கள் மீதும் அமெரிக்க வெளியுறவுத்துறை கட்டுப்பாடுகளை விதித்துள்ளது.
ஈரானுடனான அனைத்து பொருளாதார தொடர்புகளையும் உடனடியாக முறித்துக் கொள்ள வேண்டும் என்றும், தவறினால் கடுமையான விளைவுகளைச் சந்திக்க நேரிடும் என்றும் உலக நாடுகளுக்கு அமெரிக்க அதிபர் ட்ரம்ப் எச்சரிக்கை விடுத்துள்ளார். வரலாற்றிலேயே இல்லாத அளவிற்கு ஈரானுக்கு எதிராக மிகப்பெரிய “பொருளாதாரப் போர்” தொடங்கப்பட்டுள்ளதாகக் குறிப்பிட்டுள்ள அவர், எண்ணெய் கடத்தல், போலி நிறுவனங்கள் அல்லது நிதியுதவி மூலம் ஈரானுக்கு ஆதரவளிக்கும் எந்தவொரு நாடும் அமெரிக்காவின் கடுமையான நடவடிக்கைகளுக்கு ஆளாகும் என வலியுறுத்தியுள்ளார்.
அமெரிக்காவின் இந்த அதிரடி நடவடிக்கைகளுக்குப் பதிலளிக்கும் வகையில், தங்கள் மீது தொடுக்கப்பட்டுள்ள பொருளாதாரப் போரில் அமெரிக்காவுடன் கை கோர்க்கக் கூடாது என மத்திய கிழக்கு அண்டை நாடுகளுக்கு ஈரான் எச்சரிக்கை விடுத்துள்ளது. அமெரிக்காவிற்கு அண்டை நாடுகள் ஆதரவு அளித்தால், பாரசீக வளைகுடா வழியிலான முக்கியக் கப்பல் போக்குவரத்துப் பாதைகள் முடக்கப்படலாம் என ஈரானின் உச்ச தேசியப் பாதுகாப்புக் குழுத் தலைவர் மொஹ்சென் ரெஸாயி தெரிவித்துள்ளார். இதனால் மத்திய கிழக்கு பகுதியில் பெரும் கொந்தளிப்பும் சர்வதேச அளவில் பொருளாதாரத் தாக்கமும் ஏற்படும் சூழல் உருவாகியுள்ளது.