இயக்குநர் கார்த்திக் சுப்புராஜ் இயக்கத்தில் வெளியாகி நல்ல வரவேற்பைப் பெற்று வரும் ‘டோரதி’ திரைப்படத்தில் நடித்துள்ள பிரபல நடிகையும் திருநங்கையுமான ஜீவா சுப்ரமணியம், படத்தில் தன்னுடன் இணைந்து நடித்த இளம் நடிகர்களான சனந்த் மற்றும் ரிஷிகாந்த் ஆகியோரைக் குறித்துத் தனது முகநூல் பக்கத்தில் நெகிழ்ச்சியாகப் பதிவிட்டுள்ளார்.
அவர் தனது பதிவில், “சனந்த் மற்றும் ரிஷிகாந்த் ஆகிய இருவரும் எனது தங்கப் பிள்ளைகள். இவர்கள் இன்று அடைந்திருக்கும் இந்த இடத்தை சும்மா அடையவில்லை; தங்களது கனவுக்காகக் கடினமாக உழைத்து, பல போராட்டங்களைக் கடந்து வந்துள்ளனர். இவர்களுடன் ஒரே திரையில் இணைந்து நடித்தது எனக்கு மிகவும் சிறப்பு வாய்ந்த மற்றும் பெருமைக்குரிய தருணம்.
இந்த வாய்ப்பை எனக்கு அன்பளிப்பாகக் கொடுத்த தம்பி கார்த்திக் சுப்புராஜுக்கு நன்றிகள். மக்கள் வெறும் வெளிப்புற விமர்சனங்களை மட்டும் பார்த்துவிட்டுப் படத்தைப் பற்றி முடிவெடுக்காமல், திரையரங்கிற்கு நேரில் சென்று எந்த எதிர்பார்ப்பும் இல்லாமல் டோரதி திரைப்படத்தின் அனுபவத்தை உணர வேண்டும்” என்று கேட்டுக்கொண்டுள்ளார்.