ரயில்வே நிர்வாகத்தின் விசித்திரமான விதிமுறை ஒன்றின் காரணமாக, பயணி ஒருவருக்கு ரூ.500 அபராதம் விதிக்கப்பட்ட சம்பவம் தற்போது சமூக வலைதளங்களில் பெரும் கொந்தளிப்பையும் விவாதத்தையும் ஏற்படுத்தி உள்ளது. மும்பையைச் சேர்ந்த ஆதித்யா என்பவர், தனது உறவினரை ரயிலில் ஏற்றி விடுவதற்காக கல்யாண் ரயில் நிலையத்திற்குச் சென்றுள்ளார். இதற்காக அவர் முறைப்படி பிளாட்பாரம் டிக்கெட் எடுத்துக்கொண்டே உள்ளே நுழைந்துள்ளார். ஆனால், அவர் உறவினர் செல்ல வேண்டிய ரயில் திட்டமிட்ட நேரத்திற்கு வராமல், ஐந்து மணி நேரம் கடுமையான தாமதத்துடன் வந்து சேர்ந்துள்ளது.
ரயில்வே துறையின் இந்த குளறுபடியால், வேறு வழியின்றி ஆதித்யா தனது உறவினருக்காக 5 மணி நேரத்திற்கும் மேலாக ரயில் நிலைய பிளாட்பாரத்திலேயே காத்திருக்க வேண்டிய சூழ்நிலை உருவானது. இறுதியில் நீண்ட காத்திருப்புக்குப் பிறகு, தனது உறவினரை ரயிலில் ஏற்றி அனுப்பி வைத்தார். இதனைத் தொடர்ந்து அவர் ரயில் நிலையத்தை விட்டு வெளியேறுவதற்காக வாசலுக்கு வந்தபோது, அங்கு பணியில் இருந்த டிக்கெட் பரிசோதகர் அவரது பிளாட்பார டிக்கெட்டை சோதனையிட்டார். அதை ஆய்வு செய்த பரிசோதகர், அந்த டிக்கெட் காலாவதியாகிவிட்டதாகக் கூறி, ஆதித்யாவுக்கு ரூ.500 அபராதம் விதிப்பதாகக் கூறினார்.
ரயில் 5 மணி நேரம் தாமதமாக வந்ததால் தான் தம்மால் குறித்த நேரத்திற்குள் வெளியேற முடியவில்லை என்று ஆதித்யா எவ்வளவோ விளக்கியும், டிக்கெட் பரிசோதகர் அதை எதையும் காதில் வாங்கிக்கொள்ளவில்லை. ரயில்வே துறையின் தற்போதைய விதிமுறைகளின்படி, ஒரு பிளாட்பாரம் டிக்கெட் வாங்கப்பட்ட நேரத்தில் இருந்து வெறும் 2 மணி நேரம் மட்டுமே செல்லுபடியாகும் என்பதால், விதிகளின்படி அபராதம் செலுத்தியே தீர வேண்டும் என்று கூறி அவரிடம் இருந்து கட்டாயப்படுத்தி அபராதத் தொகை வசூலிக்கப்பட்டது. ரயில்வேயின் இந்த மெத்தனப்போக்கால் தனக்கு நேர்ந்த அநீதி குறித்து ஆதித்யா வீடியோ ஒன்றை பதிவு செய்து சமூக வலைதளங்களில் வெளியிட்டார்.
அதில், ரயில் 5 மணி நேரம் தாமதமாக வந்ததற்கு பயணி எப்படி பொறுப்பேற்க முடியும் என்றும், ரயில்வே துறையின் இந்த தாமதத்திற்கு யார் பொறுப்பேற்பார்கள் என்றும் அவர் மிக ஆவேசமாக கேள்வி எழுப்பியுள்ளார். இந்த வீடியோ இணையத்தில் படுவேகமாக பரவி வரும் நிலையில், பொதுமக்களும் சக பயணிகளும் ஆதித்யாவுக்கு ஆதரவாக தங்களது கருத்துக்களைப் பதிவிட்டு வருகின்றனர். ரயில்களை சரியான நேரத்திற்கு இயக்கத் தவறும் ரயில்வே நிர்வாகம், பொதுமக்கள் மீது இப்படி அபராதம் என்ற பெயரில் சுமையை ஏற்றுவது அநியாயம் என்றும், ரயில்கள் தாமதமாகும் காலங்களில் இந்த பிளாட்பார டிக்கெட் விதிமுறையை தளர்த்துவது குறித்து ரயில்வே நிர்வாகம் உடனடியாக மறுபரிசீலனை செய்ய வேண்டும் என்றும் கோரிக்கைகள் வலுத்து வருகின்றன.