கர்நாடக மாநிலம் பெங்களூருவில் உள்ள ஓல்ட் ஏர்போர்ட் சாலையில், அம்மாநில ஆளுநரின் பாதுகாப்பு வாகனங்கள் கடந்து செல்வதற்காக சுமார் 30 நிமிடங்கள் போக்குவரத்து முற்றிலுமாக நிறுத்தப்பட்டதாகக் கூறப்படுகிறது. அந்தப் பாதையில் ஏற்கனவே மேம்பாலப் பணிகள் நடந்து வருவதால் போக்குவரத்து நெரிசல் அதிகமாக இருந்தது. அப்போது, கர்ப்பிணியான தனது மனைவியுடன் காரில் வந்த ஒரு நபர், கடுமையான போக்குவரத்து நெரிசலில் சிக்கித் தவித்துள்ளார். ஆளுநரின் வாகனங்கள் வருவதற்கு முன்பாகவே நீண்ட நேரமாகப் போக்குவரத்து நிறுத்தப்பட்டதால், பொறுமையிழந்த அந்த நபர் கடும் ஆத்திரமடைந்தார்.
தன் மனைவியின் அவசர நிலையை உணர்ந்து கோபமடைந்த அந்த நபர், காரை விட்டு இறங்கி இஸ்ரோ சந்திப்புக்கு அருகிலுள்ள ஜீப்ரா கிராசிங்கில் நடுச்சாலையில் அமர்ந்து தர்ணாவில் ஈடுபட்டார். அங்கிருந்த போக்குவரத்து போலீசாருடன் அவர் வாக்குவாதத்தில் ஈடுபட்டார். “என் மனைவி கர்ப்பமாக இருக்கிறார், ஆனால் கவர்னர் இன்னும் விமான நிலையத்திலேயே இருக்கும்போதே நீங்கள் போக்குவரத்தை நிறுத்தி வைத்துள்ளீர்கள்” என்று அவர் குற்றம் சாட்டினார். நிலைமை மோசமடைவதைக் கண்ட போலீசார், அவசரக்கால உதவிப் போலீசாரை அழைத்து பேச்சுவார்த்தை நடத்தி, அவரைச் சாலையிலிருந்து அப்புறப்படுத்தி ஆளுநரின் வாகனங்களுக்கு வழிவகை செய்தனர். இந்தத் தர்ணா வீடியோ சமூக வலைத்தளங்களில் வைரலாகி பெரும் விவாதத்தை ஏற்படுத்தியுள்ளது.
இது குறித்து காவல்துறைத் தரப்பில் கூறுகையில், விஐபி பாதுகாப்பிற்காக 30 நிமிடங்கள் வரை வாகனங்களை நிறுத்தி வைக்க வாய்ப்பில்லை என்று மறுத்துள்ளனர். இருப்பினும், சமூக வலைத்தளங்களில் பொதுமக்கள் மத்தியில் எழுந்த கடுமையான எதிர்ப்பை அடுத்து, இந்தச் சம்பவம் குறித்து முறையான விசாரணைக்கு உத்தரவிடப்பட்டுள்ளது. ஒரு உதவி போலீஸ் கமிஷனர் (ACP) தலைமையில் இந்த விசாரணை நடைபெற்று வருகிறது. இதற்காக எச்ஏஎல் (HAL) விமான நிலையம் முதல் தர்ணா நடந்த இடம் வரையிலான அனைத்து சிசிடிவி (CCTV) காட்சிகளும் ஆய்வு செய்யப்பட்டு வருகின்றன. உண்மையில் 30 நிமிடங்கள் போக்குவரத்து நிறுத்தப்பட்டது உறுதியானால், சம்பந்தப்பட்ட அதிகாரிகள் மீது கடுமையான நடவடிக்கை எடுக்கப்படும் என்று உயர் போலீஸ் அதிகாரி தெரிவித்துள்ளார்.