கோவா கடற்கரைக்குச் சுற்றுலா சென்ற பெண் ஒருவர், கடலில் பாராசெயிலிங் சாகசத்தில் ஈடுபட்டபோது எதிர்பாராத விதமாக பாராசூட்டின் கயிறு அறுந்து விபத்துக்குள்ளானார். அவர் கடலில் விழுந்த தருணத்தில், பாராசூட்டுடன் இணைக்கப்பட்டிருந்த வலுவான கயிறு அவரது கழுத்தைச் சுற்றி இறுக்கியுள்ளது. இதனால் அவர் நீரில் மூழ்கும் அபாயத்துடன், கழுத்து நெரிக்கப்பட்டு உயிருக்கு ஆபத்தான நிலைக்குத் தள்ளப்பட்டார்.
இந்த விபத்து தொடர்பான வீடியோவை அந்தப் பெண் சமூக வலைதளங்களில் பகிர்ந்துள்ளார். அதில், தான் நீரில் விழுந்த பிறகு கயிறு கழுத்தில் சிக்கி மூச்சு விட முடியாமல் தவித்ததாகவும், படகில் இருந்தவர்கள் உடனடியாகச் செயல்பட்டுத் தன்னை மீட்கவில்லை என்றும் குற்றம் சாட்டியுள்ளார். பாதுகாப்பு உபகரணங்களின் தரம் மற்றும் ஊழியர்களின் கவனக்குறைவு குறித்து அவர் தனது வேதனையைப் பதிவு செய்துள்ளார்.
View this post on Instagram
இந்த வீடியோ இணையத்தில் பெரும் அதிர்ச்சியை ஏற்படுத்தியுள்ளது. சுற்றுலாத் தலங்களில் சாகச விளையாட்டுகளை நடத்தும் நிறுவனங்கள் முறையான பாதுகாப்பு விதிகளைப் பின்பற்றுவதில்லை என்ற விமர்சனங்கள் மீண்டும் எழுந்துள்ளன. தற்போது இந்தச் சம்பவம் தொடர்பாகக் கோவா சுற்றுலாத் துறை மற்றும் போலீசார் விசாரணை நடத்தி வருகின்றனர். இதுபோன்ற சாகசங்களில் ஈடுபடும் போது சுற்றுலாப் பயணிகள் மிகுந்த எச்சரிக்கையுடன் இருக்க வேண்டும் என நெட்டிசன்கள் கருத்து தெரிவித்து வருகின்றனர்.