பாகிஸ்தானின் கராச்சி நகருக்கு அருகிலுள்ள புகழ்பெற்ற சுற்றுலாத் தலமான கின்ஜார் ஏரிக்கு (Keenjhar Lake) சுற்றுலாப் பயணிகளை ஏற்றிச் சென்ற பேருந்து ஒன்று எதிர்பாராத விதமாகச் சாலை ஓரத்தில் தலைகீழாகக் கவிழ்ந்து விபத்துக்குள்ளானது. இந்த கோர விபத்தில் பேருந்தில் பயணம் செய்த 20-க்கும் மேற்பட்ட பயணிகள் படுகாயமடைந்தனர். காயமடைந்தவர்கள் உடனடியாக மீட்கப்பட்டு அருகில் உள்ள மருத்துவமனைகளில் சிகிச்சைக்காக அனுமதிக்கப்பட்டுள்ளனர்.
இந்த விபத்து தொடர்பான அதிர்ச்சியூட்டும் வீடியோ காட்சிகள் சமூக வலைதளங்களில் வைரலாகி வருகின்றன. அந்த வீடியோவில், பேருந்து மிக அதிவேகமாக வந்து கட்டுப்பாட்டை இழந்து கவிழ்வது தெளிவாகப் பதிவாகியுள்ளது. விபத்தின் தீவிரத்தைப் பார்த்த நெட்டிசன்கள் மற்றும் பொதுமக்கள் பெரும் அதிர்ச்சியடைந்துள்ளனர். ஓட்டுநரின் அஜாக்கிரதையான வேகமே இந்த விபத்திற்குக் காரணம் எனப் பலரும் குற்றம் சாட்டி வருகின்றனர்.
சமூக வலைதளங்களில் இந்த வீடியோவைப் பகிரும் மக்கள், பயணிகளின் உயிரோடு விளையாடிய அந்தப் பேருந்து ஓட்டுநருக்கு மிகக் கடுமையான தண்டனை வழங்கப்பட வேண்டும் என வலியுறுத்தி வருகின்றனர். குறிப்பாக, “அந்த ஓட்டுநரைத் தூக்கிலிட வேண்டும்” என்ற வாசகத்துடன் பலரும் தங்கள் ஆத்திரத்தை வெளிப்படுத்தி வருகின்றனர். இந்தச் சம்பவம் சுற்றுலாப் பயணிகளிடையே பெரும் அச்சத்தை ஏற்படுத்தியுள்ளது.