மத்தியப் பிரதேச மாநிலம் உஜ்ஜைனியில் உள்ள புகழ்பெற்ற மகரிஷி சாந்திபனி ராஷ்ட்ரிய வேதவித்யா பிரதிஷ்டான் குருகுலத்தில், மாணவர் ஒருவர் விடுதி காப்பாளரால் கொடூரமாகத் தாக்கப்பட்ட சம்பவம் பெரும் அதிர்ச்சியை ஏற்படுத்தியுள்ளது. மார்ச் 15-ம் தேதி வாக்கில் நடந்ததாகக் கூறப்படும் இச்சம்பவத்தின் வீடியோ தற்போது சமூக வலைதளங்களில் வைரலாகி பொதுமக்களிடையே கடும் கொந்தளிப்பை ஏற்படுத்தியுள்ளது. விடுதியில் மற்றொரு மாணவரின் படுக்கையில் படுத்து உறங்கியதற்காக, அந்த மாணவரை விடுதி காப்பாளர் தத்ததாஸ் ஷெவ்டே (Dattadas Shevde) என்பவர் தடியால் சரமாரியாகத் தாக்கியது தெரியவந்துள்ளது.
வெளியாகியுள்ள வீடியோவில், விடுதி காப்பாளர் அந்த மாணவரைத் தடியால் இரக்கமின்றித் தாக்கும்போது, அம்மாணவர் பயந்துபோய் உதவி கோருவது பதிவாகியுள்ளது. அதிர்ச்சிகரமான விஷயம் என்னவென்றால், இந்தத் தாக்குதல் நடக்கும்போது அங்கிருந்த மற்ற நபர்கள் எவரும் அதைத் தடுக்கவோ அல்லது மாணவரைக் காப்பாற்றவோ முன்வரவில்லை. இந்தச் சம்பவம் குருகுலம் போன்ற கல்வி நிறுவனங்களில் மாணவர்களின் பாதுகாப்பு மற்றும் அங்கு பின்பற்றப்படும் கடுமையான ஒழுங்குமுறை நடவடிக்கைகள் குறித்த கேள்விகளை எழுப்பியுள்ளது.
மத்திய கல்வி அமைச்சகத்தின் கீழ் இயங்கும் இந்த நிறுவனம், தற்போது சமூக வலைதளங்களில் எழுந்துள்ள கடும் விமர்சனங்களால் நெருக்கடிக்குள்ளாகியுள்ளது. குற்றஞ்சாட்டப்பட்ட ஆசிரியர் தத்ததாஸ் ஷெவ்டே மீது கடுமையான நடவடிக்கை எடுக்க வேண்டும் என நெட்டிசன்கள் கோரிக்கை விடுத்து வருகின்றனர். இச்சம்பவம் குறித்து அதிகாரிகள் தீவிர விசாரணை நடத்தி வருவதோடு, கல்வி நிறுவனங்களில் மாணவர்களுக்கு இழைக்கப்படும் இத்தகைய உடல்ரீதியான துன்புறுத்தல்களைத் தடுக்கக் கடுமையான விதிகள் அமல்படுத்தப்பட வேண்டும் என்ற கோரிக்கையும் வலுத்துள்ளது.
यह रहा दिल दहलाने वाला वीडियो 👇 pic.twitter.com/Le2tJ90bqc
— 𝑺𝒉𝒂𝒉𝒆𝒆𝒏🌺 (@shaheena451) March 22, 2026