தமிழகத்தில் உள்ள அரசுப் பள்ளிகள், அரசு உதவி பெறும் பள்ளிகள் மற்றும் தனியார் பள்ளிகளில் ஆசிரியராகப் பணியாற்றுவதற்கு ஆசிரியர் தகுதித் தேர்வில் (TET) தேர்ச்சி பெறுவது கட்டாயமாக்கப்பட்டுள்ளது. இதற்கான விண்ணப்பப் பதிவு, ஆசிரியர் தேர்வு வாரியத்தின் (TRB) அதிகாரப்பூர்வ இணையதளத்தில் கடந்த பிப்ரவரி மாதம் 18-ஆம் தேதி முதல் தொடங்கி நடைபெற்று வருகிறது. தற்போது பணியில் இருந்து வரும் ஆசிரியர்களும், புதிதாக ஆசிரியர் பணிக்குத் தயாராகி வருபவர்களும் ஆர்வத்துடன் இந்தத் தேர்வுக்கு விண்ணப்பித்து வருகின்றனர்.
இந்த நிலையில், டெட் (TET) தேர்விற்கு விண்ணப்பிப்பதற்கான கால அவகாசம் நாளை (ஏப்ரல் 10) மாலையுடன் நிறைவடைகிறது. தகுதியுள்ள விண்ணப்பதாரர்கள் விரைந்து விண்ணப்பிக்குமாறு அறிவுறுத்தப்பட்டுள்ளனர். இதனைத் தொடர்ந்து, இதற்கான தகுதித் தேர்வுகள் ஜூலை மாதம் 4 மற்றும் 5 ஆகிய தேதிகளில் நடைபெற உள்ளதாக ஆசிரியர் தேர்வு வாரியம் அறிவித்துள்ளது. தேர்விற்குத் தயாராகும் ஆசிரியர்கள் இந்த இறுதி வாய்ப்பைப் பயன்படுத்தி விண்ணப்பங்களைச் சமர்ப்பித்து வருகின்றனர்.