கேஸ் சிபிசிஐடி கைக்கு போயிருச்சு.. அரசியல் வட்டாரங்களை அலறவிட்ட ஹார்டு டிஸ்க் திருட்டு வழக்கு…. சிக்கப்போகும் ‘பெரிய தலைகள்’ யார்…?

சென்னை அண்ணாசாலையில் உள்ள தமிழ்நாடு மின்வாரிய தலைமை அலுவலகத்தில் இருந்து 34 ஹார்டு டிஸ்க்குகள் திருடப்பட்ட சம்பவம் தமிழகம் முழுவதும் பெரும் அதிர்வலைகளை ஏற்படுத்தியுள்ளது. தகவல் தொழில்நுட்ப பிரிவில் பயன்படுத்தப்பட்டு வந்த இந்த ஹார்டு டிஸ்க்குகள் காணாமல் போனது, தொடக்கத்தில் ஒரு சாதாரண திருட்டு சம்பவமாகவே பார்க்கப்பட்டது. ஆனால், அவற்றில் மின்வாரியத்தின் முக்கிய நிர்வாக தகவல்கள், ஆவணங்கள் மற்றும் தொழில்நுட்ப தரவுகள் இருந்திருக்கலாம் என்ற தகவல் வெளியானதைத் தொடர்ந்து, இந்த விவகாரம் அரசியல் ரீதியாக கடுமையான விவாதங்களையும் பல்வேறு சந்தேகங்களையும் கிளப்பியுள்ளது.

இதற்கிடையில், சென்னை காவல் ஆணையரின் உத்தரவின் பேரில் சிந்தாதிரிப்பேட்டை போலீசார் நடத்திய தீவிர விசாரணையில் பல அதிர்ச்சி தகவல்கள் வெளிவந்துள்ளன. மின்வாரிய அலுவலகத்தில் கணினி பராமரிப்பு பணியில் ஈடுபட்டு வந்த அரக்கோணத்தைச் சேர்ந்த 31 வயதான கோபிநாத் என்பவரே இந்த திருட்டில் ஈடுபட்டது கண்டுபிடிக்கப்பட்டது. அவர் திருடிய ஹார்டு டிஸ்க்குகளை ஃபார்மேட் செய்து, பெங்களூருவில் உள்ள ஒரு கணினி நிறுவனத்தில் தலா 2,500 ரூபாய்க்கு விற்றுள்ளார். இதையடுத்து, தனிப்படை போலீசார் பெங்களூரு விரைந்து சென்று, 34 ஹார்டு டிஸ்க்குகளையும் மீட்டதோடு, கோபிநாத் மற்றும் அவற்றை வாங்கிய நிறுவன உரிமையாளர் முரளி மனோகர் ஆகிய இருவரையும் கைது செய்துள்ளனர்.

இருப்பினும், இந்த வழக்கில் வெறும் பணத்திற்காக மட்டுமே திருட்டு நடந்ததா அல்லது முக்கிய ஆதாரங்களை அழிக்கும் நோக்கில் திட்டமிட்ட சதி ஏதேனும் பின்னணியில் உள்ளதா என்ற கேள்விகளை எதிர்க்கட்சிகள் வலுவாக முன்வைத்துள்ளன. முக்கிய தரவுகளை வெளியே கொண்டு செல்வதற்காக யாராவது இவரை இயக்கினார்களா என்ற கோணத்திலும் சந்தேகம் எழுப்பப்பட்டு, மத்திய புலனாய்வு அமைப்புகள் விசாரிக்க வேண்டும் என்ற கோரிக்கைகளும் எழுந்தன. இதனால், இந்த வழக்கின் தீவிரத்தன்மையையும் முக்கியத்துவத்தையும் கருத்தில் கொண்டு, சென்னை காவல்துறை இதனை சிபிசிஐடி (CBCID) விசாரணைக்கு மாற்ற பரிந்துரை செய்தது.

தற்போது டிஜிபி அலுவலகத்தின் ஒப்புதலுடன் இந்த வழக்கு அதிகாரப்பூர்வமாக சிபிசிஐடி விசாரணைக்கு மாற்றப்பட்டுள்ளது. சிபிசிஐடி அதிகாரிகள் விரைவில் வழக்கின் முழு ஆவணங்களையும் பெற்றுக்கொண்டு தங்களின் விசாரணையைத் தொடங்கவுள்ளனர். ஹார்டு டிஸ்க்குகளில் இருந்த தரவுகளின் உண்மைத் தன்மை என்ன, இந்த திருட்டின் பின்னணியில் உள்ள முக்கிய சூத்திரதாரிகள் யார் மற்றும் இதில் மேலும் பலருக்கு தொடர்பு இருக்கிறதா என்பது போன்ற பல மர்மங்களுக்கு சிபிசிஐடி-யின் அதிரடி விசாரணையில் விரைவில் விடை கிடைக்கும் என்று எதிர்பார்க்கப்படுகிறது.