தமிழக சட்டமன்ற தேர்தலில் அதிமுக கூட்டணியில் அங்கம் வகிக்கும் பாஜகவிற்கு 27 தொகுதிகள் ஒதுக்கப்பட்டுள்ளன. இதற்கான ஒப்பந்தம் கையெழுத்தாகி, வேட்புமனு தாக்கல் தொடங்கினாலும், குறிப்பிட்ட 6 தொகுதிகளுக்கான வேட்பாளர்களை இறுதி செய்வதில் கடும் இழுபறி நீடிக்கிறது. குறிப்பாக திருப்பூர் தெற்கு, ராமநாதபுரம், மானாமதுரை, அறந்தாங்கி, ஆவடி மற்றும் புதுக்கோட்டை ஆகிய தொகுதிகளில் போட்டியிட கட்சிக்குள் கடும் போட்டி நிலவுவதால், வேட்பாளர் பட்டியலை வெளியிடுவதில் தாமதம் ஏற்பட்டுள்ளதாகக் கூறப்படுகிறது.
இந்த இழுபறிக்கு முக்கியக் காரணமாக பார்க்கப்படுவது பாஜக முன்னாள் மாநில தலைவர் அண்ணாமலையின் போட்டியாகும். அண்ணாமலை சட்டமன்ற தேர்தலில் கட்டாயம் போட்டியிட வேண்டும் என டெல்லி தலைமை விரும்புவதாகவும், இது தொடர்பாக மத்திய அமைச்சர் பியூஷ் கோயல் சென்னையில் நடந்த ஆலோசனைக் கூட்டத்தில் வலியுறுத்தியுள்ளதாகவும் தகவல்கள் தெரிவிக்கின்றன. கடந்த மக்களவை தேர்தலில் கோவையில் கணிசமான வாக்குகளைப் பெற்ற அண்ணாமலை, கோவைக்கு உட்பட்ட சட்டமன்ற தொகுதிகளில் போட்டியிட ஆர்வம் காட்டினார். ஆனால், பாஜகவிற்கு ஒதுக்கப்பட்ட கோவை வடக்கு தொகுதியை வானதி ஸ்ரீனிவாசன் குறிவைத்துள்ளதால், அண்ணாமலைக்கு மாற்று தொகுதியைத் தேடும் பணியில் தலைமை இறங்கியுள்ளது.
தற்போது அண்ணாமலையை மொடக்குறிச்சி அல்லது திருப்பூர் தெற்கு தொகுதியில் களமிறக்க பாஜக மேலிடம் தீவிரமாக பரிசீலித்து வருகிறது. இருப்பினும், திருப்பூர் தெற்கு தொகுதியை ஏ.பி. முருகானந்தம் மற்றும் இந்து முன்னணி தலைவர் காடேஷ்வரர் தங்கராஜ் ஆகியோர் கோருவதால் அங்கும் சிக்கல் நீடிக்கிறது. இந்தச் சூழலில், பியூஷ் கோயல் அண்ணாமலையுடன் தனியாக 30 நிமிடங்கள் ஆலோசனை நடத்தியது அரசியல் வட்டாரத்தில் பெரும் பரபரப்பை ஏற்படுத்தியுள்ளது. அண்ணாமலையின் சம்மதம் மற்றும் தொகுதியை இறுதி செய்வதில் நிலவும் இந்த முரண்பாடுகளே பட்டியலை வெளியிடுவதைத் தள்ளிப்போட்டு வருகின்றன.
இழுபறியில் உள்ள 6 தொகுதிகளுக்கும் தலா 3 பேர் கொண்ட பட்டியலைத் தயாரித்து டெல்லி தலைமைக்கு மாநில பாஜக அனுப்பியுள்ளது. டெல்லியில் இருந்து இறுதி ஒப்புதல் கிடைத்தவுடன், இன்று அல்லது நாளைக்குள் பாஜகவின் முழுமையான வேட்பாளர் பட்டியல் வெளியாகும் என எதிர்பார்க்கப்படுகிறது. வேட்புமனு தாக்கல் செய்ய இன்னும் இரண்டு நாட்களே அவகாசம் உள்ள நிலையில், பாஜக வேட்பாளர்கள் அனைவரும் வரும் 6-ம் தேதி ஒரே நாளில் மனு தாக்கல் செய்யத் திட்டமிட்டுள்ளதாகக் கூறப்படுகிறது. அண்ணாமலையின் தேர்தல் களம் எது என்பது குறித்த அதிகாரப்பூர்வ அறிவிப்பை தொண்டர்கள் மிகுந்த எதிர்பார்ப்புடன் காத்திருக்கின்றனர்.