சிலிண்டர் கசிவு… அதிரவைத்த பெரும் சத்தம்… பானி பூரி குடோனில் பயங்கர தீ விபத்து… சிறுவனுக்கு நேர்ந்த கதி… 3 பேர் நிலைமை மோசம்… !

பெங்களூரு ஆர்.ஆர். நகர் அருகே உள்ள பட்டங்கெரே பகுதியில் சனிக்கிழமை காலையில் நிகழ்ந்த சிலிண்டர் விபத்தில் சிறுவன் உள்பட மூவர் பலத்த தீக்காயமடைந்தனர். பீகாரைச் சேர்ந்த பாப்லு என்பவர் அப்பகுதியில் பானி பூரி தொழிலுக்கான பொருட்களைச் சேமித்து வைக்கக் குடோன் ஒன்றை வாடகைக்கு எடுத்துப் பயன்படுத்தி வந்துள்ளார். இரவில் குடோனில் இருந்த சிலிண்டரிலிருந்து எரிவாயு கசிந்து அறை முழுவதும் பரவியிருந்த நிலையில், காலையில் அவர் கதவைத் திறந்தபோது பலத்த சத்தத்துடன் தீப்பிழம்பு வெடித்துச் சிதறியது.

இந்த எதிர்பாராத தீ விபத்தில் சிக்கி பாப்லு, அருகில் நின்றிருந்த லட்சுமம்மா மற்றும் 9 வயது சிறுவன் ஆகியோர் காயமடைந்தனர். தகவலறிந்து விரைந்து வந்த காவல்துறையினர், காயமடைந்த மூவரையும் மீட்டு சிகிச்சைக்காக உடனடியாக பிஜிஎஸ் மருத்துவமனையில் அனுமதித்தனர். தொடர்ந்து தீயணைப்புத்துறையினரும் சம்பவ இடத்தை ஆய்வு செய்த நிலையில், விபத்துக்கான துல்லியமான காரணம் குறித்து போலீசார் வழக்குப் பதிவு செய்து தீவிர விசாரணை மேற்கொண்டு வருகின்றனர்.