விமானத்தில் தேனீக்கள் மொய்த்தால் என்ன செய்வது..? பைலட் கையாண்ட வேற லெவல் பிளான்..! சமூக வலைத்தளங்களில் தீயாய் பரவும் வீடியோ…!!

மெக்சிகோவின் கான்கன் சர்வதேச விமான நிலையத்தில் யுனைடெட் ஏர்லைன்ஸ் விமானத்தின் இறக்கையில் ஆயிரக்கணக்கான தேனீக்கள் மொய்த்ததால், விமானம் புறப்படுவதில் சிறிய தாமதம் ஏற்பட்டது. கான்கன்னிலிருந்து அமெரிக்காவின் லாஸ் ஏஞ்சல்ஸ் நகருக்குப் புறப்படவிருந்த போயிங் 737 ரக விமானத்தின் வலது பக்க இறக்கையின் கீழ் பகுதியில் இந்தத் தேனீக்கள் திடீரென ஒரு கூட்டமாக வந்து அமர்ந்தன. இதனால் அதிர்ச்சியடைந்த தரைக் கட்டுப்பாட்டு ஊழியர்கள் மற்றும் பயணிகள் இந்த விசித்திரமான காட்சியைத் தங்கள் மொபைல் போன்களில் வீடியோவாகப் பதிவு செய்தனர்.

பொதுவாக இது போன்ற சமயங்களில் தேனீ வளர்ப்பவர்கள் வரவழைக்கப்பட்டு அவை பாதுகாப்பாக அப்புறப்படுத்தப்படும். ஆனால், இந்த சம்பவத்தில் விமானத்தின் பைலட் மாற்று வழியைக் கையாண்டார். விமானம் ஓடுபாதையில் வேகமாகச் செல்லும்போது ஏற்படும் காற்றின் வேகத்திலேயே தேனீக்கள் பறந்துவிடும் என்று அவர் முடிவு செய்தார். அதன்படியே, விமானம் டேக்-ஆஃப் செய்யத் தொடங்கி வேகமெடுத்தபோது, இறக்கையில் இருந்த தேனீக்கள் அனைத்தும் காற்றின் வேகத்தால் ஒவ்வொன்றாகப் பறந்துபோய் மறைந்தன.

இந்த அசாதாரணமான மற்றும் சுவாரசியமான வீடியோ சமூக ஊடகங்களில் வெளியாகித் தீயாகப் பரவி வருகிறது. விமானத்தின் வேகத்திற்கு ஈடுகொடுக்க முடியாமல் தேனீக்கள் பறந்து செல்லும் காட்சி இணையவாசிகளிடையே பெரும் வேடிக்கையை ஏற்படுத்தியுள்ளது. இந்தத் தேனீக்களால் விமானத்தின் உள்ளே இருந்த பயணிகளுக்கோ அல்லது ஊழியர்களுக்கோ எந்தவித பாதிப்பும் ஏற்படவில்லை என்றும், விமானம் எவ்வித அசம்பாவிதமும் இன்றி பாதுகாப்பாக லாஸ் ஏஞ்சல்ஸ் நகரைச் சென்றடைந்தது என்றும் விமான நிறுவனம் உறுதிப்படுத்தியுள்ளது.