தவெக-வில் இணைய கயல்விழி அழகிரி போட்ட ‘அந்த’ கண்டிஷன்?…. கடைசி நிமிடத்தில் ஷாக் கொடுத்த விஜய்… தென்மாவட்ட அரசியலில் அடுத்த மூவ்…!

முன்னாள் மத்திய அமைச்சர் மு.க.அழகிரியின் மகளான கயல்விழி அழகிரி, நடிகர் விஜய்யின் தமிழக வெற்றிக் கழகத்தில் (தவெக) இணைய உள்ளார் என்ற தகவல் கடந்த சில வாரங்களாக அரசியல் வட்டாரங்களில் பெரும் பரபரப்பை ஏற்படுத்தி வந்தது. குறிப்பாக, நேற்று முன்தினம் (ஜூன் 13) தவெக தலைமையின் முன்னிலையில் அதிமுக மற்றும் பாஜகவைச் சேர்ந்த முன்னாள் அமைச்சர் பச்சைமால், முன்னாள் எம்.பி.க்கள் பாலகங்கா, வனரோஜா, இளவரசன் மற்றும் விஜயதாரணி போன்ற முக்கியப் பிரமுகர்கள் கட்சியில் இணைந்தனர். இந்த நிகழ்வில் கயல்விழி அழகிரியும் அதிகாரப்பூர்வமாக இணைவார் என்று பலராலும் பெரிதும் எதிர்பார்க்கப்பட்ட நிலையில், கடைசி நேரத்தில் அவர் பங்கேற்காதது அரசியல் தளத்தில் புதிய விவாதங்களை கிளப்பியுள்ளது.

கடந்த சில மாதங்களாகவே தவெக தலைமையுடன் கயல்விழி அழகிரி தொடர்ந்து தொடர்பில் இருந்து வந்ததாகக் கூறப்படுகிறது. தமிழக முதல்வராக விஜய் பதவியேற்ற நிகழ்விலும் அவர் பங்கேற்றதுடன், தலைமைச் செயலகத்திற்குச் சென்று அமைச்சர்களைச் சந்தித்ததும் இவரின் அரசியல் நகர்வை உறுதிப்படுத்துவதாக அமைந்தது. எனினும், நேற்று நடைபெற்ற இணைப்பு விழாவில் அவர் கலந்துகொள்ளாததற்கு, கட்சித் தலைமையிடம் அவர் முன்வைத்த சில முக்கிய நிபந்தனைகளே காரணம் என்று அவரது ஆதரவாளர் வட்டாரங்கள் தெரிவிக்கின்றன.

மதுரை மற்றும் தென் மாவட்ட அரசியலில் அழகிரி குடும்பத்திற்கு இன்றும் தனிப்பட்ட செல்வாக்கு இருப்பதாகக் கருதப்படும் நிலையில், அதனைப் பயன்படுத்தி வரவிருக்கும் உள்ளாட்சித் தேர்தலில் மதுரை மாநகராட்சி மேயர் பதவிக்கான தவெக வேட்பாளராகத் தன்னை அறிவிக்க வேண்டும் என்ற எதிர்பார்ப்பைக் கயல்விழி முன்வைத்துள்ளார். ஆனால் தவெக தலைமையோ, தற்போதைய சூழலில் எந்தவொரு பதவிக்கும் முன்கூட்டியே உத்தரவாதம் அளிக்கத் தயாராக இல்லை என்ற நிலைப்பாட்டைக் கொண்டுள்ளது. உள்ளாட்சித் தேர்தல் வேட்பாளர் தேர்வு என்பது அப்போதைய அரசியல் சூழல் மற்றும் கட்சியின் வளர்ச்சியைப் பொறுத்தே அமையும் என்று தலைமை தெரிவித்ததால், இந்த தற்காலிகத் தொய்வு ஏற்பட்டுள்ளதாகத் தெரிகிறது.

இருப்பினும், கயல்விழி அழகிரிக்கும் தவெக தலைமைக்கும் இடையிலான பேச்சுவார்த்தை முற்றிலும் முடங்கிவிடவில்லை என்றும், இருதரப்பிலும் இன்னும் சுமுகமான தொடர்பு நீடித்து வருவதாகவும் அரசியல் நோக்கர்கள் குறிப்பிடுகின்றனர். தென் மாவட்டங்களில் அழகிரி குடும்பத்தின் தாக்கத்தை தவெக எதிர்பார்ப்பதால், அவருக்கான கதவுகள் இன்னும் திறந்தே உள்ளன. இதனால், உள்ளாட்சித் தேர்தல் நெருங்கும் நேரத்தில் மேயர் பதவி தொடர்பான சுமுகமான முடிவு எட்டப்பட்டு, கயல்விழி அழகிரி நிச்சயம் தமிழக வெற்றிக் கழகத்தில் இணைவார் என்றே அவரது ஆதரவாளர்கள் நம்பிக்கையோடு தெரிவிக்கின்றனர்.