இந்த வருடத்துக்கு பின் பிறந்தவர்கள் இனி வாழ்நாள் முழுவதும் சிகரெட் வாங்க முடியாது… இங்கிலாந்தின் அதிரடிச் சட்டம்..!!

இங்கிலாந்து நாடாளுமன்றத்தின் இரு அவைகளிலும் நிறைவேற்றப்பட்டுள்ள இந்த “புகையிலை மற்றும் வேப்ஸ் மசோதா” (Tobacco and Vapes Bill), ஜனவரி 1, 2009 அன்று அல்லது அதற்குப் பிறகு பிறந்த எவருக்கும் புகையிலை பொருட்களை விற்பனை செய்வதை நிரந்தரமாகத் தடை செய்கிறது. இதன் மூலம், தற்போது 17 வயது அல்லது அதற்குக் குறைவான வயதுடையவர்கள் தங்கள் வாழ்நாளில் சட்டப்பூர்வமாகச் சிகரெட் வாங்கவே முடியாத நிலை ஏற்படும். ஒவ்வொரு ஆண்டும் சிகரெட் வாங்குவதற்கான குறைந்தபட்ச வயது வரம்பு உயர்த்தப்படுவதால், வரும் தலைமுறையினர் மத்தியில் சிகரெட் பழக்கம் முற்றிலும் ஒழிக்கப்படும் என எதிர்பார்க்கப்படுகிறது.

 இந்தச் சட்டம் சிகரெட்டுகளுக்கு மட்டுமல்லாமல், மின்-சிகரெட்டுகள் எனப்படும் ‘வேப்ஸ்’ (Vapes) தயாரிப்புகளுக்கும் கடும் கட்டுப்பாடுகளை விதிக்கிறது. குறிப்பாகக் குழந்தைகளைக் கவரும் வகையில் வேப்ஸ் தயாரிப்புகளின் சுவை (Flavours), பேக்கேஜிங் மற்றும் விளம்பரங்கள் இருப்பதைத் தடை செய்ய அரசுக்கு அதிகாரம் வழங்கப்பட்டுள்ளது. மேலும், பள்ளிகள், மருத்துவமனைகள் மற்றும் விளையாட்டு மைதானங்களுக்கு வெளியேயும் புகைப்பிடிக்கத் தடை விதிக்கப்பட்டுள்ளது. இந்த விதிகளை மீறி குழந்தைகளுக்குப் புகையிலை விற்கும் வணிகர்களுக்கு உடனடியாக ₹27,000 (£270) அபராதம் விதிக்கப்படும்.

 இங்கிலாந்தில் ஆண்டுதோறும் சுமார் 64,000 மரணங்களுக்குப் புகைப்பிடித்தலே முதன்மைக் காரணமாக உள்ளது. மேலும், புகையிலை தொடர்பான நோய்களுக்குச் சிகிச்சை அளிக்க அந்நாட்டுச் சுகாதாரத் துறைக்கு (NHS) ஆண்டுக்கு பில்லியன் கணக்கான ரூபாய் செலவாகிறது. இந்தச் சட்டத்தின் மூலம் லட்சக்கணக்கான உயிர்களைக் காப்பாற்ற முடியும் என்றும், மருத்துவமனைகளின் பணிச்சுமையைக் குறைக்க முடியும் என்றும் சுகாதாரத் துறை அமைச்சர் வெஸ் ஸ்டீரிட்டிங் தெரிவித்துள்ளார். இது இங்கிலாந்தின் பொதுச் சுகாதார வரலாற்றில் எடுக்கப்பட்ட மிக முக்கியமான நடவடிக்கையாகப் பார்க்கப்படுகிறது.