தமிழக வெற்றிக் கழகத்தின் தலைவரான நடிகர் விஜய், வரவிருக்கும் சட்டமன்றத் தேர்தலில் எந்தத் தொகுதியில் போட்டியிடுவார் என்ற எதிர்பார்ப்பு அரசியல் வட்டாரத்தில் பெரும் பேசுபொருளாகியுள்ளது. கட்சியின் முதல் அரசியல் மாநாடு நடைபெற்ற வி.சாலை அமைந்துள்ள விக்கிரவாண்டி தொகுதியையே அவர் தனது முதல் தேர்வாக வைத்திருப்பதாகத் தகவல்கள் வெளியாகியுள்ளன. இதற்குக் காரணம், மாநாடு நடத்திய இடத்திலேயே அவர் தனது தேர்தல் பயணத்தைத் தொடங்க விரும்புவதும், அங்கிருக்கும் 100 அடி உயரக் கொடிக்கம்பம் மற்றும் கல்வெட்டு கட்சியின் வரலாற்றுச் சின்னமாக மாறியிருப்பதுமே ஆகும். மேலும், சென்னை-திருச்சி தேசிய நெடுஞ்சாலையில் அமைந்துள்ள இந்தத் தொகுதி, மாநிலத்தின் பிற பகுதிகளுக்குச் சென்று வர ஏதுவான போக்குவரத்து வசதியைக் கொண்டிருப்பதும் ஒரு முக்கியக் காரணமாகக் கருதப்படுகிறது.
விக்கிரவாண்டி தவிர, ஆங்கில எழுத்தான ‘V’ இல் தொடங்கும் வேளச்சேரி மற்றும் விருகம்பாக்கம் ஆகிய தொகுதிகளும் ஆலோசனையில் உள்ளதாகக் கூறப்படுகிறது. கிராமப்புறங்கள் நிறைந்த விக்கிரவாண்டி தொகுதியில் 100-க்கும் மேற்பட்ட ஊராட்சிகள் உள்ள நிலையில், அங்கு போட்டியிடுவது கட்சியின் அடித்தளத்தை வலுப்படுத்தும் என தவெக தரப்பில் நம்பப்படுகிறது. 234 தொகுதிகளிலும் தனித்துப் போட்டியிடத் தயாராகி வரும் வேளையில், கட்சியின் முதல்வர் வேட்பாளரான விஜய் விக்கிரவாண்டியைத் தேர்வு செய்தால், அது கட்சித் தொண்டர்களிடையே பெரும் உற்சாகத்தை ஏற்படுத்தும் என எதிர்பார்க்கப்படுகிறது. இது குறித்த அதிகாரப்பூர்வ அறிவிப்பு வேட்பாளர் தேர்விற்குப் பிறகு வெளியாகும் எனத் தெரிகிறது.