இந்திய ரயில்வே நாடு முழுவதும் ரயில்வே கட்டமைப்பை மேம்படுத்தி வரும் நிலையில், தெற்கு ரயில்வே திருச்சி முதல் திருவனந்தபுரம் வரையிலான வழித்தடத்தில் சிக்னல் அமைப்புகளை நவீனமயமாக்க ரூ.92.31 கோடி நிதி ஒதுக்கீடு செய்துள்ளது. இந்த மேம்பாட்டுப் பணிகள் மூலம் ரயில்களின் வேகம் மணிக்கு 130 கிலோ மீட்டர் வரை அதிகரிக்கப்படும். திருச்சி – திண்டுக்கல், திண்டுக்கல் – திருநெல்வேலி மற்றும் திருநெல்வேலி – திருவனந்தபுரம் என மூன்று கட்டங்களாக இந்தப் பணிகள் பிரிக்கப்பட்டு, சிக்னல் மற்றும் தொழில்நுட்ப வசதிகள் உலகத் தரத்திற்கு உயர்த்தப்பட உள்ளன.
இந்த அதிவேக ரயில் இயக்கத்தினால் அனந்தபுரி எக்ஸ்பிரஸ் மற்றும் தாம்பரம் – கொல்லம் எக்ஸ்பிரஸ் போன்ற முக்கிய ரயில்களின் பயண நேரம் வெகுவாகக் குறையும். முதற்கட்டமாக சென்னை – அரக்கோணம் மற்றும் அரக்கோணம் – ஜோலார்பேட்டை பிரிவுகளில் ஏற்கனவே 130 கி.மீ வேகத்தில் ரயில்கள் இயக்கப்பட்டு வரும் நிலையில், தற்போது இந்த வசதி தென் தமிழகம் மற்றும் கேரளா நோக்கிய வழித்தடங்களுக்கும் விரிவாக்கம் செய்யப்படுகிறது. இது பயணிகளிடையே பெரும் மகிழ்ச்சியை ஏற்படுத்தியுள்ளது.
பாதுகாப்பை உறுதி செய்யும் வகையில், தண்டவாளங்களின் இருபுறமும் வேலிகள் அமைக்கவும் ரயில்வே திட்டமிட்டுள்ளது. குறிப்பாக சென்னை – குண்டூர் மற்றும் சென்னை – அரக்கோணம் வழித்தடங்களில் கால்நடைகள் விபத்துக்குள்ளாவதைத் தடுக்கவும், அத்துமீறி நுழைவதைத் தவிர்க்கவும் இந்த வேலிகள் பெரும் உதவியாக இருக்கும். சிக்னல் நவீனமயமாக்கல் மற்றும் வேக அதிகரிப்பு பணிகள் விரைந்து முடிக்கப்பட்டு, மக்கள் பயன்பாட்டுக்கு வரும்போது தமிழகத்தின் ரயில் பயணம் புதிய பரிமாணத்தை எட்டும் என எதிர்பார்க்கப்படுகிறது.