கடைசி நிமிடத்தில் மாறிய ஆட்டம்… ஆளுநர் மாளிகையில் இருந்து வந்த போன் கால்… தமிழகத்தின் புதிய முதலமைச்சராகிறார் விஜய்…!

தமிழக சட்டப்பேரவைத் தேர்தல் முடிவுகளுக்குப் பிறகு நீடித்து வந்த அரசியல் இழுபறி தற்போது ஒரு முடிவுக்கு வந்துள்ளது. 108 இடங்களைப் பிடித்து தனிப்பெரும் கட்சியாக உருவெடுத்த தமிழக வெற்றிக் கழகம், ஆட்சி அமைக்கத் தேவையான 118 இடங்களை எட்ட முடியாமல் தவித்து வந்தது. காங்கிரஸ் மற்றும் இடதுசாரி கட்சிகள் ஏற்கனவே ஆதரவு தெரிவித்த நிலையில், தவெக-வின் பலம் 116 ஆக இருந்தது. இந்நிலையில், எஞ்சிய இரண்டு இடங்களுக்காக நிலவிய எதிர்பார்ப்புகளுக்கு விடை கொடுக்கும் வகையில், விடுதலைச் சிறுத்தைகள் கட்சியின் 2 சட்டமன்ற உறுப்பினர்களும் தவெக-விற்கு நிபந்தனையற்ற ஆதரவு அளிக்கத் தொல். திருமாவளவன் ஒப்புக்கொண்டுள்ளதாகத் தகவல்கள் வெளியாகியுள்ளன.

இந்தத் தீர்மானகரமான முடிவுக்குப் பின்னால் ஒரு முக்கியக் காரணம் இருப்பதாகக் கூறப்படுகிறது. தமிழகத்தில் எந்தக் கட்சியும் பெரும்பான்மையை நிரூபிக்க முடியாத சூழல் நீடித்தால், ஆளுநர் ஆர்.வி. அர்லேக்கர் மத்திய அரசுக்குப் பரிந்துரை செய்து குடியரசுத் தலைவர் ஆட்சியை அமல்படுத்த வாய்ப்புள்ளதாகத் தகவல்கள் பரவின. தமிழகத்தில் ஆளுநர் ஆட்சி ஏற்படுவதைத் தவிர்க்கவும், ஒரு நிலையான ஜனநாயக அரசை உறுதிப்படுத்தவும் வேண்டும் என்ற நோக்கிலேயே திருமாவளவன் இந்த ஆதரவு முடிவை எடுத்ததாக விசிக வட்டாரங்கள் தெரிவிக்கின்றன. இதற்கான ஆதரவுக் கடிதம் தவெக நிர்வாகி ஆதவ் அர்ஜுனாவிடம் ஒப்படைக்கப்பட்டதாகத் தெரிகிறது.

மறுபுறம், தமிழக அரசியலின் மற்றொரு முக்கிய சக்தியான அதிமுக-வும் தீவிர நகர்வுகளை மேற்கொண்டு வந்தது. புதுச்சேரியில் தங்கவைக்கப்பட்டிருந்த அதிமுக எம்.எல்.ஏ-க்கள் சென்னை திரும்பியதைத் தொடர்ந்து, எடப்பாடி பழனிசாமி ஆட்சி அமைக்க உரிமை கோரலாம் என எதிர்பார்க்கப்பட்டது. ஆனால், விசிக-வின் ஆதரவு தவெக-விற்கு உறுதியானதைத் தொடர்ந்து, பெரும்பான்மை பலம் விஜய்க்குச் சாதகமாக மாறியுள்ளது. இதனை உணர்ந்த எடப்பாடி பழனிசாமி, ஆட்சி அமைக்க உரிமை கோரும் முயற்சியைக் கைவிட்டு, அமையவிருக்கும் புதிய அரசுக்குத் தனது வாழ்த்துகளைத் தெரிவித்துள்ளதாக அரசியல் வட்டாரங்களில் பேசப்படுகிறது.

தற்போது தவெக-வின் பலம் 118-ஐ எட்டியுள்ள நிலையில், விஜய் தமிழகத்தில் ஆட்சி அமைக்கத் தேவையான முழுமையான பெரும்பான்மையைப் பெற்றுள்ளார். கடந்த சில நாட்களாக மூன்று முறை ஆளுநரைச் சந்தித்தும் போதிய பலம் இல்லாததால் இழுபறியில் இருந்த ஆட்சி அமைக்கும் பணி, இனி வேகம் எடுக்கும் என எதிர்பார்க்கப்படுகிறது. ஆளுநர் மாளிகையில் இருந்து விஜய்க்கு முறைப்படியான அழைப்பு எப்போது வரும், தமிழகத்தின் புதிய முதலமைச்சராக அவர் எப்போது பதவியேற்பார் என்ற ஆவலுடன் அரசியல் கட்சியினரும் பொதுமக்களும் அடுத்த சில மணி நேரங்களைக் கூர்ந்து கவனித்து வருகின்றனர்.