தமிழக சட்டமன்றத் தேர்தல் முடிவுகளுக்குப் பிறகு, 108 தொகுதிகளில் வெற்றி பெற்று தனிப்பெரும் கட்சியாக உருவெடுத்துள்ள தமிழக வெற்றிக் கழகம் (தவெக), ஆட்சி அமைக்க உரிமை கோரி வரும் நிலையில் தமிழக அரசியல் களம் சூடுபிடித்துள்ளது. தவெக தலைவர் விஜய், தன்னை ஆட்சி அமைக்க அழைக்கக் கோரி இரண்டாவது நாளாக ஆளுநர் மாளிகைக்குச் சென்றார். இருப்பினும், பெரும்பான்மையை (118 இடங்கள்) நிரூபித்தால் மட்டுமே ஆட்சி அமைக்க அனுமதிக்க முடியும் என்பதில் ஆளுநர் உறுதியாக இருப்பதாகத் தெரிகிறது. இந்த இழுபறி நீடிக்கும் சூழலில், தவெகவிற்கு ஆதரவு அளிப்பது குறித்து விடுதலைச் சிறுத்தைகள் கட்சியின் தலைவர் தொல். திருமாவளவன் தனது நிலைப்பாட்டைத் தெளிவுபடுத்தியுள்ளார்.
சென்னையில் செய்தியாளர்களைச் சந்தித்த திருமாவளவன், தனிப்பெரும் கட்சியாக வெற்றி பெற்றுள்ள தவெகவை ஆட்சி அமைக்க அழைப்பதே முறையான ஜனநாயகப் பண்பு என்று வலியுறுத்தினார். ஆளுநர் வேண்டுமென்றே காலம் தாழ்த்துவது திட்டமிட்ட சதி என்று சந்தேகிப்பதாகக் குறிப்பிட்ட அவர், பாஜாக தமிழக அரசியலில் குழப்பத்தை ஏற்படுத்த முயல்வதாகக் குற்றம் சாட்டினார். இந்திய கம்யூனிஸ்ட் கட்சி ஏற்கனவே ஆளுநரின் இந்த தாமதத்தைக் கண்டித்துள்ள நிலையில், ஆளுநர் தனது கடமையிலிருந்து தவறுவது ஏற்புடையதல்ல என்றும் அவர் சுட்டிக்காட்டினார்.
தவெக தரப்பிலிருந்து விசிகவிற்கு ஆதரவு கோரி கடிதம் எழுதப்பட்டுள்ளதை உறுதி செய்த திருமாவளவன், அந்தக் கோரிக்கையைத் தாங்கள் புறந்தள்ளவில்லை என்று தெரிவித்தார். காங்கிரஸ் கட்சி ஏற்கனவே விஜய்க்கு ஆதரவு தெரிவித்துள்ள நிலையில், விசிக மற்றும் இடதுசாரி கட்சிகளின் முடிவுக்காகத் தமிழகமே காத்துக் கொண்டிருக்கிறது. இது குறித்துப் பேசிய அவர், “எங்களுக்கு என்று ஒரு நடைமுறை உள்ளது, நாங்கள் அவசரப்பட்டு முடிவெடுக்க முடியாது. தவெகவின் கோரிக்கைக்கு மதிப்பளிக்கிறோம், ஆனால் கட்சியின் உயர்மட்டக் குழு கூடி விவாதித்த பிறகே இறுதி முடிவு எடுக்கப்படும்” என்று விளக்கமளித்தார்.
அதிமுக மற்றும் திமுக கூட்டணி வைக்கப்போவதாகப் பரவும் தகவல்கள் வெறும் வதந்தி என்று குறிப்பிட்ட அவர், விசிகவின் உயர்மட்டக் குழு கூட்டம் விரைவில் கூடும் என்றும், அதில் எடுக்கப்படும் முடிவே கட்சியின் அதிகாரப்பூர்வ முடிவாக இருக்கும் என்றும் கூறினார். 2026 தேர்தல் முடிவுகள் ஒரு தொங்கு சட்டசபையை உருவாக்கியுள்ள நிலையில், ஆளுநரின் அடுத்தகட்ட நடவடிக்கை மற்றும் விசிக போன்ற முக்கியக் கட்சிகளின் ஆதரவு நிலைப்பாடு ஆகியவை தான் விஜய் முதல்வராகப் பொறுப்பேற்பதைத் தீர்மானிக்கும் காரணியாக அமையும் என்பதில் ஐயமில்லை.