பாஜகவுடன் கூட்டணி வைத்து ஓட்டுக் கேட்கும் அதிமுகவின் செயல்பாட்டைத் திருமாவளவன் கடுமையாக விமர்சித்தார். “எந்தக் காலத்திலும் அதிமுக பாஜகவுடன் கூட்டணி வைக்காது” என ஜெயலலிதா உறுதியாக இருந்ததாகக் குறிப்பிட்ட அவர், தற்போது எடப்பாடி பழனிசாமி பாஜகவுடன் கைகோர்த்திருப்பதைச் சுட்டிக்காட்டினார். அதிமுக வெற்றி பெற்றால் தமிழகத்தில் பாஜகவின் ஆதிக்கம் ஓங்கும் என்றும், ஈபிஎஸ்-ஐ ஓரங்கட்டிவிட்டு பாஜக ஆட்சியைக் கைப்பற்றும் என்றும் அவர் எச்சரித்தார்.
அதிமுகவை மெல்ல மெல்ல விழுங்கும் வேலையில் பாஜக ஈடுபட்டு வருவதாகக் குற்றம் சாட்டிய அவர், இதைத் தடுத்து நிறுத்தவே திமுக தலைவர் மு.க. ஸ்டாலின் ஒரு வலுவான கூட்டணியை அமைத்துள்ளதாகக் கூறினார். தமிழகத்தில் பாஜக காலூன்றக் கூடாது என்ற தொலைநோக்குப் பார்வையோடு ஸ்டாலின் செயல்படுவதால், அவருடன் தாம் ‘உடும்புப் பிடியாக’ நெருக்கமான உறவு வைத்துள்ளதற்குக் காரணம் இதுதான் என விளக்கமளித்தார்.
விஜய் உள்ளிட்ட மற்றவர்கள் ஆட்சி மற்றும் அதிகாரத்தில் பங்கு என்று அழைப்பு விடுத்தாலும், கொள்கை முடிவால் திமுக கூட்டணியிலேயே நீடிப்பதாக அவர் தெரிவித்தார். இந்தத் தேர்தல் என்பது வெறும் திமுக – அதிமுக இடையிலான போட்டி அல்ல; மாறாக இது பிற்போக்குச் சக்திகளுக்கும் முற்போக்குச் சக்திகளுக்கும் இடையே நடக்கும் ஒரு பெரும் போர் என்று தனது உரையில் திருமாவளவன் ஆணித்தரமாகப் பதிவு செய்தார்.